ԵՐԵՎԱՆ, 1 մարտի – Sputnik. ՀՀ ԱԺ «Հայաստան» խմբակցության ղեկավար Սեյրան Օհանյանը զարմացած է, որ ՀՀ իշխանությունները չգիտեն` ինչ հիմքով են ՌԴ սահմանապահները գտնվում Սյունիքի մարզում։ Այս մասին նա հայտարարեց խորհրդարանական ճեպազրույցների ժամանակ` անդրադառնալով Սյունիքում, մասնավորապես` Ներքին Հանդի ճանապարհին ռուս սահմանապահների ներկայության իրավական հիմքին և մանդատին։
Նշենք, որ ՀՀ վարչապետն էլ ԱԺ–ում հայտարարել էր` ռուս սահմանապահների ո՛չ մանդատ, ո՛չ էլ պայմանագիր գոյություն չունի Ներքին Հանդում։
«Զարմանում եմ, որ ՀՀ իշխանությունները մինչև հիմա չգիտեն` բանավոր, թե գրավոր պայմանագրի հիման վրա են ՌԴ սահմանապահներն այդ հատվածում գտնվում։ Զարմանում եմ նաև, որ ՀՀ–ում կարելի է 2020 թվականի նոյեմբերի 10-ի հայտարարությունից հետո բանավոր հրահանգ տալ և ասել` զորքերը հետ քաշեք մինչև Հայաստանի սահման, երբ պայմանավորվածություն կար զորքերը կանգնեցնել այնտեղ, որտեղ մարտական գործողություններն ավարտվել են։ Չեն հասկացել, որ յուրաքանչյուր այդպիսի հատված հիմք է հանդիսանալու հետագայում սահմանազատման և սահմանագծման առումով բանակցություններում շահ ունենալու համար»,– նշեց Օհանյանը։
Նա ընդգծեց` եթե նմանատիպ պայմանագիր չկա, ապա նշանակում է, որ երբ «տեղները նեղ է եղել», ՀՀ իշխանություններնը բանավոր ասել են` կարող եք գնալ և տեղակայվել այնտեղ։
Ընդդիմադիր պատգամավորը շեշտեց` հայ–ադրբեջանական սահմանին, դեմ առ դեմ կանգնած են Հայաստանի ԶՈւ–ի և Ադրբեջանի ԶՈւ–ի ստորաբաժանումները, ընդ որում, վերջիններս գտնվում են ՀՀ տարածքում։ Նրա խոսքով` Ադրբեջանի կողմից իրականացրած ցանկացած սադրանք կանխելը, դրանից հետո համապատասխան միջոցառումներ ձեռնարկելը ՀՀ զինված ուժերի գործառույթն է։