Եվրոպան հայտարարարություններից այն կողմ չի գնալու։ Sputnik Արմենիայի հետ զրույցում ասել է ՀՅԴ կուսակցության անդամ, ԱԺ պաշտպանության և անվտանգության հանձնաժողովի նախկին ղեկավար և Սանկտ Պետերբուրգում նախկին գլխավոր հյուպատոս Հրայր Կարապետյանը` մեկնաբանելով Եվրախորհրդարանի օրերս ընդունած բանաձևերի հնարավոր արդունքը։
«Մեզ համար դեռ թարմ են թե ԵՄ, թե ԱՄՆ պաշտոնյաների այն հայտարարությունները, թե իրենք թույլ չեն տա Արցախի հայաթափում, Արցախի վրա հարձակում, Լաչինի միջանցքի վերաբերյալ բազմաթիվ հայտարարություններ և այլն»,– ասաց Կարապետյանը։
Հիշեցնենք` Փետրվարի 28-ին Եվրախորհրդարան ընդունել էր Եվրամիության արտաքին քաղաքականության և անվտանգության ու պաշտպանության քաղաքականության վերաբերյալ 2 բանաձև, որոնցով Եվրամիությանը կոչ էր արվում ՝ հրաժարվել ադրբեջանական էներգակիրներից, անհապաղ պատժամիջոցներ սահմանել Ադրբեջանի դեմ ու կասեցնել էներգետիկայի ոլորտում ռազմավարական գործընկերության մասին փոխըմբռնման հուշագրի գործողությունը, պատրաստ լինել Ադրբեջանի ռազմաքաղաքական ղեկավարության դեմ նպատակային և անհատական պատժամիջոցներ սահմանելուն և Ադրբեջանի կողմից Հայաստանի դեմ ցանկացած ռազմական ագրեսիայի դեպքում նավթի և գազի ներմուծումը կասեցնելուն։
Եվրախորհրդարանը նաև կոչ է անում ուժեղացնել Հայաստանում Եվրամիության առաքելության մանդատը, ավելացնել դիտորդների քանակը, երկարաձգել առաքելության գործողության ժամկետը, ինչպես նաև դիտորդներ տեղակայել Թուրքիայի հետ սահմանին։ Եվրոպական խորհրդարանն Ադրբեջանին կոչ է անում թույլատրել Եվրամիության դիտորդական առաքելության ներկայությունը հայ–ադրբեջանական սահմանից այն կողմ և Լեռնային Ղարաբաղում։