ԵՐԵՎԱՆ, 26 փետրվարի – Sputnik. ՀՀ արտգործնախարար Արարատ Միրզոյանը, որը գտնվում է Ժնևում, Հարավային Կովկասի վերջին զարգացումները քննարկել է ՄԱԿ մարդու իրավունքների բարձր հանձնակատար Վոլկեր Տյուրկի հետ: Տեղեկությունը հայտնում է ՀՀ արտաքին գործերի նախարարության մամուլի ծառայությունը։
Միրզոյանը ներկայացրել է Հայաստանի և Ադրբեջանի միջև հարաբերությունների կարգավորման գործընթացում առանցքային հարցերի շուրջ ՀՀ մոտեցումները՝ հիմնված տարածքային ամբողջականության, սահմանների անքակտելիության, ինքնիշխանության առանցքային սկզբունքների աներկբա հարգման վրա։
Նա ընդգծել է, որ այս սկզբունքերը պահպանելու, ինչպես նաև տարածաշրջանում ագրեսիվ հռետորաբանությունից և իրավիճակի սրմանն ուղղված քայլերից զերծ մնալու պարագայում հնարավոր կլինի առաջ շարժվել խաղաղության գործընթացում։
Միրզոյանն անդրադարձել է նաև Լեռնային Ղարաբաղում Ադրբեջանի կողմից իրականացված էթնիկ զտմանը։
Նա ներկայացրել է իրենց հայրենիքից բռնի տեղահանված հայ բնակչության կարիքների և իրավունքների հասցեագրման ուղղությամբ իրականացվող քայլերը
Զրուցակիցները քննարկել են ՄԱԿ-ի մարդու իրավունքների պաշտպանության համակարգի շրջանակներում համագործակցությանն առնչվող մի շարք հարցեր:
Նշենք, որ ՀՀ արտգործնախարարը Ժնև է մեկնել աշխատանքային այցով։ Գերատեսչությունն ավելի վաղ հայտնել էր, որ նա ելութով հանդես կգա ՄԱԿ մարդու իրավունքների խորհրդի 55–րդ նիստի և Զինաթափման համաժողովի բարձրաստիճան հատվածներում: