ԵՐԵՎԱՆ, 25 փետրվարի - Sputnik. ՀՀ ԱԳ նախարար Արարատ Միրզոյանը ցավակցություն է հայտնել Վալենսիայում տեղի ունեցած խոշոր հրդեհի հետևանքով զոհված և տուժած մարդկանց ընտանիքներին։ Այս մասին նա գրել է իր X միկրոբլոգում:
Ավելի վաղ հայտնել էինք, որ Իսպանիայի Վալենսիա քաղաքում եռօրյա սուգ է հայտարարվել` քաղաքի բարձրահարկ շենքերում տեղի ունեցած խոշոր հրդեհից հետո։
«Իմ խորին ցավակցությունն եմ հայտնում հրդեհի զոհերի ընտանիքներին և շուտափույթ ապաքինում մաղթում տուժածներին»,-գրել է Միրզոյանը:
Հիշեցնենք, որ ողբերգության հետևանքով տուժել է 450 մարդ, առնվազն տասը մարդ զոհվել է, ևս 14 մարդ համարվում է անհետ կորած:
Պաշտոնապես հրդեհի պատճառը դեռ հայտնի չէ: Սակայն, տեղական ԶԼՄ-ների տեղեկատվության համաձայն, որոնք վկայակոչում են մի շարք փորձագետների կարծիքը, կրակը կարող էր արագ տարածվել շենքի երեսպատման դյուրավառ նյութերի պատճառով: