ԵՐԵՎԱՆ, 23 փետրվարի - Sputnik. ԵՄ-ն կշարունակի կանոնավոր կերպով ֆինանսական աջակցություն ցուցաբերել Ուկրաինային: Այս մասին ասվում է Եվրոպական խորհրդի, Եվրահանձնաժողովի և Եվրախորհրդարանի նախագահների համատեղ հայտարարության մեջ: Հայտարարության տեքստը մեջբերում է ՌԻԱ Նովոստին։
«ԵՄ-ն որոշել է բանակցություններ սկսել Ուկրաինայի անդամակցության շուրջ և կօգնի նրան ԵՄ անդամակցության ճանապարհին․․․ Եվրամիությունը կշարունակի Ուկրաինային տրամադրել կանոնավոր և ակնկալվող ֆինանսական աջակցությունը»,-ասված է հայտարարության մեջ:
Նշվում է նաև, որ 2024-2027 թվականների համար 50 միլիարդ եվրոյի չափով ֆինանսական օգնության փաթեթը «կօգնի Ուկրաինային բավարարել իր կենսական կարիքները, վերականգնել տնտեսությունն ու արդիականացնել իր ինստիտուտները և ամրապնդել ժողովրդավարությունն ու օրենքի գերակայությունը»:
Անցած տարվա դեկտեմբերի 14-ին ԵՄ գագաթնաժողովում Ուկրաինայի և Մոլդովայի հետ բանակցություններ սկսելու մասին որոշում է ընդունվել ԵՄ-ին ապագա անդամակցության շուրջ մասին: 2022 թվականի հունիսին ԵՄ-ն Ուկրաինային և Մոլդովային ԵՄ թեկնածու երկրների կարգավիճակ է շնորհել՝ մի քանի խիստ պայման դնելով անդամակցության շուրջ բանակցությունները պաշտոնապես սկսելու համար։ ԵՄ-ում բազմիցս խոստովանել են, որ նման որոշումը մեծ մասամբ խորհրդանշական էր և նպատակ ուներ աջակցել Կիևին և Քիշնևին Մոսկվայի հետ դիմակայության մեջ։
ԵՄ թեկնածու երկրի կարգավիճակն ինքնին, ինչպես նաև բանակցությունների մեկնարկը դեռ Եվրամիությանը պարտադիր անդամակցություն չեն նշանակում, այդ քայլերը նաև ոչ մի բանի չեն պարտավորեցնում Բրյուսելին։ Թեկնածուի կարգավիճակ ստանալը ԵՄ-ին անդամակցելու բավական երկար ճանապարհի սկիզբն է միայն։ Թուրքիան թեկնածուի կարգավիճակում է 1999 թվականից, իսկ 2005 թվականից ԵՄ-ի հետ «բանակցություններ է վարում» անդամակցության շուրջ, Հյուսիսային Մակեդոնիան թեկնածու է 2005 թվականից, Չեռնոգորիան՝ 2010 թվականից, Սերբիան՝ 2012 թվականից:
Այս պահի դրությամբ վերջինը ԵՄ անդամ է դարձել Խորվաթիան՝ 2013 թվականին, գործընթացը 10 տարի է տևել։