ԵՐԵՎԱՆ, 23 փետրվարի – Sputnik. Եվրասիական տնտեսական հանձնաժողովի արդյունաբերության և ագրոարդյունաբերական համալիրի հարցերով կոլեգիայի անդամ (նախարար) Արտակ Քամալյանը մեկնաբանել է Էկոնոմիկայի նախարարի թափուր պաշտոնը զբաղեցնելու մասին լուրը։
Նշենք, որ շուրջ 1 շաբաթ առաջ Վահան Քերոբյանը հեռացավ նախարարի պաշտոնից ու այս ընթացքում նախարարի պաշտոնում նշանակվելու մասին մի քանի անձի` ԱԺ ՔՊ–ական պատգամավորներ Գևորգ Պապոյանի, Բաբկեն Թունյանի անունները շրջանառվեցին, սակայն այդ լուրերն արագ հեքվեցին։ Դրանից հետո միայն սկսեց շրջանառվել Արտակ Քամալյանի անունը։
«Ո՛չ, հնարավոր չէ։ Բացառում եմ»,– Sputnik Արմենիայի հետ զրույցում ասաց Քամալյանը` մեկնաբանելով էկոնոմիկայի նախարարի պաշտոնում իր հարավոր նշանակման հարցը։
Հիշեցնենք, որ փետրվարի 14-ին Վահան Քերոբյանը հայտնել էր, որ հրաժարական է տալիս նախարարի պաշտոնից։ ՀՀ էկոնոմիկայի նախարարության պաշտոնյաների շուրջ կոռուպցիոն սկանդալ էր սկսվել հունվարի 31-ից։ Այժմ Քերոբյանը մեղադրվում է խմբի կազմում շահադիտական նկատառումներով, նախնական համաձայնությամբ պաշտոնեական լիազորությունները չարաշահելու, անցնելու, դրանք օգտագործելու կամ ազդեցությունը կիրառելու հոդվածով։ Նա չի ընդունում առաջադրված մեղադրանքը։ Էկոնոմիկայի նախկին նախարարն այժմ տնային կալանքի տակ է։
Արտակ Քամալյանը ԵՏՀ է գործուղվել 2020 թ. փետրվարի 1-ին՝ 4 տարի ժամկետով։ Մինչ այդ նա զբաղեցնում էր գյուղատնտեսության, ապա էկոնոմիկայի փոխնախարարի պաշտոնը: ԵՏՀ կոլեգիայում Արտակ Քամալյանի ժամկետն օրեր առաջ լրացել է, նրան կփոխարինի Գոհար Բարսեղյանը, որն արդեն մի քանի տարի է՝ գլխավորում է ինտեգրման զարգացման դեպարտամենտը։