ԵՐԵՎԱՆ, 23 փետրվարի – Sputnik. 2021 թ. նախընտրական ծրագրում ՀՀ իշխանությունների խոստացած տարեկան միջինում 7% տնտեսական աճը, ըստ էության, ապահովված է։ Կառավարության նիստում այս հայտարարությունն արեց ՀՀ վարչապետ Նիկոլ Փաշինյանը։
ՀՀ կառավարության` 2023 թ. ծրագրի կատարման նախագծի քննարկման ժամանակ նա նաև նշեց, որ 7%–ը շատ հավակնոտ ցուցանիշ է։
«2023 թ. մեզ հաջողվել է արձանագրել 8.7 տնտեսական աճ, 2022 թվականին 12.6 տոկոս էր, 2021 թ. նախընտրական տարում` 5.6 տոկոս։ Այսինքն` միջինում մենք ապահովել ենք ավելի քան տարեկան 7 տոկոս տնտեսական աճի ցուցանիշը։ Սա համապարփակ ցուցանիշ է, ինչը բոլոր ոլորտների վրա ունենում է կոնկրետ ազդեցություն»,– նշեց նա։
ՀՀ վարչապետը հատուկ ընդգծեց ՀՀ բյուջետային ցուցանիշները, ըստ որոնց` 2023 թ. կառավարությունը կարողացել է ապահովել 2 տրլ 222 մլրդ դրամի բյուջետային եկամուտ։ Ըստ նրա` 2017 թ. ցուցանիշների համեմատ այս թիվն ավելի է 1 տրլ 64 մլրդ դրամով, արդյունքում հարկային եկամուտների աճը 2017 թ. համեմատ 2023 թվականին կազմել է շուրջ 92 տոկոս։
«Սա ոչ թե մենք ենք ավելացրել, այլ հարկ վճարողները։ Մենք ձեռք բերածով չպիտի բավարարվենք, քանի որ մեր երկրում շարունակում է մնալ ստվերային տնտեսություն, որի մեջ մենք պետք է նկատի ունենանք այն դեպքերը, երբ գործնականում հարկային վարչարարություն չենք իրականացնում, երբ օրենքով նախատեսված է, սակայն չենք իրականացնում»,– նշեց Փաշինյանը։
ՀՀ կառավարության` 2023 թ. ծրագրի կատարման նախագիծը կներկայացվի ԱԺ քննարկմանն ու հաստատմանը։