ԵՐԵՎԱՆ, 23 փետրվարի – Sputnik. ՀՀ 21 հազար քաղաքացի արդեն իսկ հայտարարագրել է, որ վարձով բնակարան է տալիս։ ՀՀ կառավարության նիստում այս ցուցանիշը ներկայացրեց ՀՀ վարչապետ Նիկոլ Փաշինյանը։
«Մեր քաղաքացիներն իրենց բնակարանների վարձակալության համար արդեն սկսել են ակտիվորեն հայտարարագրել դրանք։ Երբ մենք դա որոշում էինք, կար հոռետեսություն, թե ծրագիրը չի հաջողի, սակայն արդեն իսկ 21 հազար քաղաքացի հայտարարագրել է, որ իրենք վարձով բնակարան են տալիս»,– նշեց Փաշինյանը։
ՀՀ ՊԵԿ նախագահ Ռուստամ Բադասյանը հստակեցրեց, որ 15 392 քաղաքացի է ներկայացրել շուրջ 21 հազար հայտարարագիր, այսինքն` մեկ անձը կարող է վարձակալության տարբեր հայտարարագրեր ներկայացրած լինել։
Հիշեցնենք` 2023 թվականի դեկտեմբերի 1-ից ուժի մեջ են մտել ՀՀ հարկային օրենսգրքով սահմանված փոփոխությունները, որոնց համաձայն` վարձակալությունից ստացած եկամտից պետությանը հարկ չվճարողների համար սահմանվել է տուգանք` գույքի արժեքի 5%–ի չափով, բայց ոչ ավելի, քան 500 հազար դրամը։ Իսկ 1 տարվա ընթացքում խախտումը կրկնելու դեպքում տուգանքը կկրկնապատկվի, բայց չի գերազանցի 1 մլն դրամը։