ԵՐԵՎԱՆ, 22 փետրվարի – Sputnik. Հայ–ռուսական հարաբերությունների վատթարացման մասին պնդումների ֆոնին տնտեսական ցուցանիշները հակառակն են խոսում։ Sputnik Արմենիայի հետ զրույցում այս մասին ասաց ՀՀ ԱԺ «Քաղաքացիական պայմանագիր» խմբակցության պատգամավոր Ալեքսեյ Սանդիկովը, որը մասնակցում էր Հայաստանում ՌԴ ԱԴԾ սահմանապահ վարչության տարածքում ռուս–հայկական բարեկամության հուշարձանին ծաղիկներ դնելու արարողությանը։
«Չնայած մամուլում շրջանառվում է այն հայեցակարգը, որ հայ–ռուսական հարաբերությունները վատանում են... Իհարկե, կան մի շարք հարցեր, որոնք լրացուցիչ քննարկման կարիք ունեն։ Ընդհանուր առմամբ, կարծում եմ, որ տնտեսական ցուցանիշները, անընդհատ աճող ապրանքաշրջանառությունը և մեր անդամակցությունը ԵԱՏՄ–ին, թվերն ու փաստերը հակառակն են խոսում»,– ասաց ՔՊ–ական պատգամավորը։
Նրա խոսքով` ընդհանուր առմամբ աշխատելու տեղ կա, և համագործակցության միջխորհրդարանական հանձնաժողովի պատգամավորների խնդիրն է ձգտել այդ հարաբերությունների բարելավմանը։
Սանդիկովը շեշտեց, որ այսօր ՌԴ ԱԴԾ սահմանապահ վարչության ընկերների հրավերով նշում են Հայրենիքի պաշտպանի օրը, իսկ փետրվարի 23-ին միջոցառումներ կլինեն Գյումրու 102-րդ ռազմաբազայում։
Հաջորդ շաբաթ Հայաստանից մոտ 250 երիտասարդ կմասնակցի Սոչիում անցկացվող Երիտասարդների համաշխարհային փառատոնին։
Պատգամավորը նաև հայտնեց, որ մայիսի 9-ին ՌԴ Դաշնության խորհրդի գործընկերների հետ պայմանավորվածությունների շրջանակում նախատեսվում է Հայաստանից 2 վետերան ուղարկել Մոսկվա` Հաղթանակի շքերթին: