ԵՐԵՎԱՆ, 22 փետրվարի – Sputnik. Արցախի նախագահ Սամվել Շահրամանյանը համարում է, որ իր թիկնազորի աշխատակից Աշոտ Դանիելյանին ձերբակալելու հիմքերը շինծու են։ Նա այդ մասին ասաց լրագրողների հետ զրույցում։
Աշոտ Դանիելյանը ձերբակալվել է փետրվարի 20–ին։ ՀՀ ՆԳՆ քրեական ոստիկանության և պարեկային ծառայության աշխատակիցները նրան թմրանյութ պահելու և իրացնելու կասկածանքով բերման են ենթարկել Երևանի Մոսկովյան փողոցից։
«ՀՀ իրավապահ մարմինները պետք է շատ արագ լուծեն նրան ազատ արձակելու հարցը։ Մեզ մոտ հարցեր է առաջացնում նաև այդ ձերբակալության օրինաչափությունը. 20 հոգով դիմակավորված` քաղաքի կենտրոնում ձերբակալել մեկին, ով կապ ունի Արցախի ղեկավարի հետ, ընդ որում` ձերբակալել նախագահին սպասարկող մեքենայի միջից, դա մեծ հարցեր է առաջացնում, որոնց պատասխանները մենք առաջիկայում կստանանք»,– ընդգծեց նա։
Ըստ Շահրամանյանի` այսպիսի քայլերով այն, ինչ կապված է Արցախի հետ, փորձում են դրա վրա կափարիչ դնել, փակել այդ հարցը։
«Կարծում եմ, որ պետք չէ գնալ այդ ճանապարհով, այլ պետք է գտնել լուծումներ Արցախի ու արցախցիների համար»,– ասաց նա։
Արցախի նախագահի կարծիքով` մինչև այդ հարցը չստանա արդարացի լուծում, մենք միշտ բաց վերք ենք ունենալու, և այն միշտ արնահոսելու է։