ԵՐԵՎԱՆ, 21 փետրվարի – Sputnik. ԵՄ–ն 27 ընկերության նկատմամբ արտահանման սահմանափակումներ կկիրառի Ռուսաստանի դեմ պատժամիջոցները շրջանցելու համար։ Այս հայտարարությունն արել է Նիդեռլանդների արտգործնախարար Հանկե Բրյուինս Սլոտը։ Նրա խոսքերը մեջբերում է ՌԻԱ Նովոստին։
Ավելի վաղ ԵՄ խորհրդում Բելգիայի նախագահությունը հայտնել էր Ռուսաստանի դեմ ԵՄ պատժամիջոցների նոր՝ 13-րդ փաթեթի համաձայնեցման մասին, որը պետք է պաշտոնապես հաստատվի մինչև փետրվարի 24-ը:
«Բացի այդ, մենք արտահանման սահմանափակումներ ենք մտցնում 27 ընկերությունների նկատմամբ՝ Ռուսաստանի դեմ պատժամիջոցները շրջանցելու համար", - գրել է Նիդեռլանդների արտգործնախարարը X սոցիալական ցանցում:
Ընդ որում` նա չի հստակեցրել, թե կոնկրետ որ երկրներում գործող ընկերությունների մասին է խոսքը։
Սլոտը նաև հայտնել է, որ հակառուսական պատժամիջոցների 13-րդ փաթեթը կառնչվի 193 ֆիզիկական և իրավաբանական անձանց:
Հիշեցնենք` ՌԴ նախագահ Վլադիմիր Պուտինն ավելի վաղ հայտարարել էր, որ Ռուսաստանին զսպելու և թուլացնելու քաղաքականությունը Արևմուտքի երկարաժամկետ ռազմավարությունն է, իսկ պատժամիջոցները լուրջ հարված են հասցրել ամբողջ համաշխարհային տնտեսությանը:
Արևմտյան երկրներում բազմիցս կարծիքներ են հնչել, որ հակառուսական պատժամիջոցներն արդյունավետ չեն։