ԵՐԵՎԱՆ, 20 փետրվարի – Sputnik. ՀՀ վարչապետ Նիկոլ Փաշինյանը կարծում է, որ այսօրվանից հարկավոր է գտնել մի ընկերություն, որը կկարողանա առաջարկել բուհերի շենքերի արդյունավետ կառավարման սխեմա: Այդ մասին նա ասել է ԿԳՄՍ նախարարության Բարձրագույն կրթության և գիտության կոմիտեում կառույցի 2023 թ. գործունեության հաշվետվության քննարկման ժամանակ։ Տեղեկությունը հայտնում է ՀՀ վարչապետի մամուլի ծառայությունը։
«Այսինքն՝ վարձակալության տրվեն դրանք բոլորը և այլն, և ամբողջ եկամուտն ուղղվի Ակադեմիական քաղաքի ֆինանսավորմանը: Կարծում եմ՝ այդ գույքի կառավարումն էլ է շատ լուրջ խնդիր, և պետք է մասնագիտացված միջազգային հեղինակություն ունեցող ցուցակված ընկերություն գտնենք, ով գա և մեզ սխեմա առաջարկի, թե ինչպես է պետք կառավարել այդ ենթակառուցվածքը»,– ասել է Նիկոլ Փաշինյանը:
Խորհրդակցության ընթացքում նա անդրադարձել է նաև արտերկրի բուհերում երիտասարդների ուսման համար կրթաթոշակների տրամադրման հարցին և ընդգծել ուսումից հետո նրանց հետվերադարձի ապահովման մեխանիզմների ներդրման անհրաժեշտությունը:
«Փաստացի ուղիղ կամ անուղղակի կարող ենք միլիարդ ծախսել, երիտասարդներին ուղարկել արտասահման սովորելու, և բոլորը կծափահարեն: Հետո ոչ մեկը չի հարցնի՝ այդ երիտասարդների քանի՞ տոկոսը հետ եկավ, որովհետև առաջնային նպատակն այն է, որ իրենք գան Հայաստանում աշխատեն, որ մեր այս պրոբլեմների մի մասն իրենց պրոֆեսիոնալիզմի շնորհիվ լուծվեն, այսինքն՝ կառավարությանը, պետությանն օգնեն, լուծել»,– նշել է վարչապետը:
Ըստ նրա` միայն այն, որ տվյալ անձը արտերկրի հեղինակավոր բուհերում սովորելով հաջողությունների է հասել, միակ նպատակը չէ, որի համար պետական բյուջեից պետք է ծախս արվի։
«Պետք է վերադարձի մեխանիզմը հասկանանք... Ու այստեղ նորից հանրային կառավարման բարեփոխումների մասին է խոսքը, որովհետև եթե մարդը գնաց, ենթադրենք սովորեց, Օքսֆորդն ավարտեց, ինքը չի գալու 200, 300 հազար դրամով նախարարությունում վարչության պետ աշխատի: Չի աշխատելու»,– ընդգծեց Փաշինյանը: