ԵՐԵՎԱՆ, 20 փետրվարի – Sputnik. «Ամերիաբանկի» և HSBC -ի հետ գործարքները հնարավորինս թափանցիկ են և անհանգստանալու տեղ չեն թողնում: Տեղեկությունը ասուլիսի ժամանակ հայտարարել է Հայաստանի բանկերի միության նախագահ Դանիել Ազատյանը՝ մեկնաբանելով վրացական Bank of Georgia-ի սեփականատերերի կողմից «Ամերիաբանկի» բաժնետոմսերի վերահսկիչ փաթեթը գնելու մասին հայտարարությունները և բրիտանական HSBC բանկի՝ հայկական շուկայից դուրս գալու և «Արդշինբանկի» կողմից դրա ակտիվները Հայաստանում գնելու մասին հայտարարությունը:
Ազատյանի խոսքով՝ բանկերի առք ու վաճառքը երկրում տեղի է ունեցել նաև նախկինում (2010 թվականին «Ամերիաբանկը» ձեռք բերեց «Կասկադ բանկը», վերջին տարիներին «Ինեկոբանկը» ձեռք բերեց գերմանական ProCredit-ի դուստր բանկը, ղազախստանյան BTA-ն Հայաստանում իր բանկը վաճառեց «Հայէկոնոմբանկին», իսկ Զարգացման հայկական բանկը մտավ «Արարատբանկի» կազմի մեջ):
Նա նշեց, որ Bank of Georgia Group-ը ներկայացված է Լոնդոնի ֆոնդային բորսայում, ինչը նշանակում է բարձր մակարդակի թափանցիկություն բոլոր գործարքներում: Հայկական շուկա այնպիսի խոշոր միջազգային ներդրողների մուտքը, ինչպիսիք են JP Morgan-ը, BlackRock-ը կամ Vanguard-ը (Bank of Georgia-ի սեփականատերերի թվում են), շատ կաևոր է հանրապետության բանկային համակարգի համար:
Ինչ վերաբերում է HSBC-ին, ապա վերջին տարիներին, ինչպես կարելի է նկատել, այս կորպորացիան կրճատում է այն շուկաները, որտեղ աշխատում է՝ կենտրոնանալով իր համար առաջնահերթությունների վրա։ 2021 թվականից այս բանկը դուրս է եկել մանրածախ վարկավորումից Ֆրանսիայում և ԱՄՆ-ում, ինչպես նաև Հունաստանում։ Բացի այդ, այն աստիճանաբար լքում էր ԱՊՀ երկրները (Հայաստանը մնում է համագործակցության միակ երկիրը, որտեղ այս բանկը դեռ գործում է)։