ԵՐԵՎԱՆ, 19 փետրվարի – Sputnik. ՌԴ ուժայինները ուկրաինական գործակալի են չեզոքացրել, որն ընտրություններից առաջ պայթուցիկով ահաբեկչություն էր ծրագրել Զապորոժիեի մարզում քաղաքական գործիչներից մեկի դեմ։ Տեղեկությունը հայտնում է ՌԴ անվտանգության դաշնային ծառայության հասարակայնության հետ կապերի կենտրոնը։
«Անվտանգության դաշնային ծառայությունը բացահայտել և կանխել է Ռուսաստանի քաղաքացի Վիտալի Դյատլենկոյի գործունեությունը։ Ուկրաինայի անվտանգության ծառայության կողմից հավաքագրված անձը պատրաստվում էր 2024 թվականի ընտրական փուլի նախաշեմին ահաբեկչություն իրականացնել Զապորոժիեի մարզի քաղաքական գործիչներից մեկի նկատմամբ», – ասված է հաղորդագրության մեջ։
Ըստ ԱԴԾ–ի`Ուկրաինայի անվտանգության ծառայության աշխատակիցները նրան զինել են պայթուցիկ նյութերով և համակարգել ծրագրերը։ Ձերբակալության պահին Դյատլենկոն դիմադրություն է ցուցաբերել անվտանգության մարմինների աշխատակիցների նկատմամբ և պատասխան գործողություններով չեզոքացվել։
Քաղաքացիական բնակչության և իրավապահ մարմինների աշխատակիցների շրջանում տուժածներ չկան։
Քննիչները որոշում են քրեական գործ հարուցելու հարցը։