ԵՐԵՎԱՆ, 19 փետրվարի – Sputnik. Արցախի նախկին պետնախարար Ռուբեն Վարդանյանը որևէ առնչություն չունի «Ամերիաբանկի» հնարավոր վաճառքի հետ։ Վարդանյանի հիմնած «Ապրելու երկիր» կուսակցության անդամ, ՀՀ աշխատանքի և սոցիալական հարցերի նախկին նախարար Մեսրոպ Առաքելյանն այս մասին գրել է ֆեսյբուքյան էջում։
Ավելի վաղ հայտնել էինք, որ «Վրաստանի բանկի» սեփականատեր «Bank of Georgia Group PLC»–ն 303,6 մլն դոլարով ձեռք է բերել Հայաստանի խոշորագույն բանկերից մեկի՝ «Ամերիաբանկի» բաժնետոմսերը։ Այժմ «Ամերիաբանկի» բաժնետերերն են «Իմաստ Գրուպ» ընկերությունը (նախկին «Ամերիա Գրուպը», որի բաժնետոմսերի 48,82%–ը հիմնադրվել է Ռուբեն Վարդանյանի կողմից), Վերակառուցման և զարգացման եվրոպական բանկը (17,71 %), Ասիական զարգացման բանկը (13,91 %), ինչպես նաև «ESPS Group»–ը, որում ընդգրկված են «Ameria Group»–ի մի շարք մենեջերներ (12,05%):
Առաքելյանն ընդգծել է, որ Ռուբեն Վարդանյանը անձամբ չի հանդիսանում «Ամերիաբանկի» բաժնետեր։
«Ռուբեն Վարդանյանի 48,8 % բաժնեմասը կառավարման է հանձնված «Իմաստ գրուպ» ընկերությանը։ Ոչ մի բաժնետեր իրավասու չէ նման հարցերի շուրջ միայնակ որոշում կայացնել: Ռուբեն Վարդանյանը վաղուց չի զբաղվել բանկի կառավարմամբ՝ դուրս գալով բանկի խորհրդի կազմից։ Կարճ ասած՝ Ռուբեն Վարդանյանը որևէ առնչություն չունի բանկի հնարավոր վաճառքի հետ»,– գրել է Առաքելյանը։
Ըստ նրա` բանկի հնարավոր վաճառքի շուրջ քննարկումները սկսվել են դեռևս 2022 թ․։
Առաքելյանը նշել է, որ բանկի վաճառքի հնարավոր գործարքը պետք է ստանա ՀՀ պետական մարմինների հաստատումը։
Հիշեցնենք, որ 2023 թ. տարեվերջի դրությամբ «Ամերիաբանկի» ակտիվները կազմել են 1 տրլն 410 մլրդ դրամ։ Ակտիվների ծավալով բանկը տարիներ շարունակ ՀՀ–ում առաջատարն էր, սակայն վերջին տարիներին առաջատարին դիրքերը զիջել է Արդշինբանկին:
Ինչ վերաբերում է «Վրաստանի բանկին», ապա նրա ամենամեծ բաժնետերը «Georgia Capital»–ն է, սակայն բաժնետոմսերը պատկանում են այնպիսի ներդրումային կազմակերպությունների, ինչպիսիք են «JP Morgan»-ը, «BlackRock»-ը, «Vanguard»-ը և այլն: