ԵՐԵՎԱՆ, 19 փետրվարի – Sputnik. Երևան նոր ժամանած 30 ավտոբուսները կարող են շուտ գիծ մտնել, եթե մի քանիսի համար հարկերը կրկնակի վճարվեն։
Երևանի քաղաքապետարանի տրանսպորտի վարչության պետ Վազգեն Հարությունյանը նշեց, որ մրցույթներն անցկացված են, մաքսազերծման աշխատանքներն էլ ամբողջությամբ ավարտված, միայն 1 մասնավոր գծի հետ խնդիր կա, իրենց պայմանագրի ժամկետը մարտի 1-ին է ավարտվում։
«Մնացածի պարագայում պատրաստ ենք, հարկային վճարումներն էլ արված են։ Եթե շուտ գիծ մտնենք` մի քանի օրում, ապա կրկնակի գումար պետք է վճարվի։ Կարող ենք սպասել, որպեսզի մարտի 1-ից բոլորը միասին գիծ մտնեն»,– նշեց Հարությունյանը։
Երևանի քաղաքապետ Տիգրան Ավինյանը հետաքրքրվեց, թե ինչու պետք է կրկնակի գումար վճարել ու ինչ գումարի մասին է խոսքը։ Ի պատասխան «Երևանի ավտոբուս» ՓԲԸ–ի տնօրեն Հովհաննես Մանուկյանը նշեց, որ հարկային պարտավորությունը 1 նստատեղի համար ամսական 2000 դրամ է։
«Վճարենք, ոչինչ։ Եթե մի քանի օրից կարող ենք գիծ մտնել, ապա 10 օրվա համար ավելի շուտ մտնելը խնդիր չէ»,– ասաց Ավինյանը։
Նա նաև ընդգծեց, որ այս տարի պետք է ամբողջացնել ավտոբուսների համար նախատեսված առանձնացված գծերի ծրագիրը, քննարկումներ ունենալ, որպեսզի գարնանը գործընթացը սկսվի։