ԵՐԵՎԱՆ, 17 փետրվարի- Sputnik. Բուխարեստում ընթացող Եվրոպայի ազատ ոճի ըմբշամարտի առաջնության 70 կգ քաշայինների եզրափակիչում Արման Անդրեասյանը, 7։3 հաշվով հաղթելով Վրաստանը ներկայացնող Ակակի Կեմերտելիձեին, առաջին անգամ նվաճեց չեմպիոնական տիտղոս։
Եվրոպայի առաջնությունում Անդրեասյանը իր ելույթները սկսեց 1/8 եզրափակիչից, որտեղ 3։1 հաշվով հաղթանակի հասավ Գերմանիան ներկայացնող Ալեքսանդր Սեմիսորովի նկատմամբ։ Քառորդ եզրափակիչում Անդրեասյանը դժվարին գոտեմարտում 6։5 հաշվով հաղթանակի հասավ Ֆրանսիան ներկայացնող Սեյֆուլա Իտաևի նկատմամբ։
Կիսաեզրափակիչ գոտեմարտը 65 կգ քաշային կարգում աշխարհի չեմպիոն հռչակված ու քաշային կարգը փոխած Հունգարիայի ներկայացուցիչ Իսլամ Մուժուկաևի հետ դրամատիկ ավարտ ունեցավ։ Գոտեմարտի ընթացքում Արմանը պարտվում էր 0։5 հաշվով, իսկ գոտեմարտի ավարտից մի քանի վայրկյան առաջ կատարեց հաղթական գցումն ու հաղթանակի հասավ 8։5 հաշվով։
Եզրափակիչ գոտեմարտում շատ համառ պայքար ծավալվեց վրացի Ակակի Կեմերտելիձեի հետ։ Երկու ըմբիշներն էլ արժանի մրցակիցներ էին։ Առաջին մրցափուլից հետո 2։1 հաշվով առջևում վրացի ըմբիշն էր։ Եվրոպայի չեմպիոնը որոշվեց երկրորդ մրցափուլում։ Արման Անդրեասյանը գերազանց մարտ վարեց ու գոտեմարտի վերջին վայրկյաններին, հիանալի հնարք կատարելով, վաստակեց 4 միավոր ու հաղթանակի հասավ 7։3 հաշվով։ Արմանը առաջին անգամ նվաճեց Եվրոպայի չեմպիոնի կոչումը։
Արման Անդրեասյանը իր հաղթանակը նվիրել է 44–օրյա պատերազմում անմահացած իր եղբորը` Տարոն Անդրեասյանին։ Տարոնը միայնակ կռվել է թշնամու մեծաքանակ զինվորների հետ։ Որպեսզի գերի չընկնի, նա պայթեցրել է իր ձեռքի նռնակը և զոհվել։
Եվրոպայի առաջնության մրցումային վերջին օրը` վաղը, հնարավոր է, որ մեր ըմբիշներից ոմանք իրավունք ստանան սփոփիչ գոտեմարտերի միջոցով պայքարել բրոնզե մեդալի համար։