ԵՐԵՎԱՆ, 15 փետրվարի – Sputnik․ Պաշտոնական Բաքվից Հայաստանի օրենսդրական դաշտի մասին հնչող հայտարարությունները մեր երկրի ինքնիշխանության խախտում են և միջամտություն մեր երկրի ներքին գործերին: Կառավարության այսօրվա նիստում այս հայտարարությունն արեց ՀՀ վարչապետ Նիկոլ Փաշինյանը։
Նրա խոսքով` մեկնաբանությունները, թե ՀՀ օրենսդրությունում խաղաղության պայմանագրին խանգարող որևէ դրույթ կա, իրականության հետ կապ չունի։
«Խաղաղության պայմանագրի բանակցությունների ընթացքում Հայաստանին և Ադրբեջանին հաջողվել է մի շարք հոդվածների վերաբերյալ համաձայնության գալ, և դրանցից մեկն այն մասին է, որ կողմերը չեն կարող հղում անել իրենց օրենսդրության վրա՝ խաղաղության պայմանագրի որևէ դրույթի կատարումից հրաժարվելու համար։ Հետևաբար ՀՀ օրենսդրության մեջ խաղաղության պայմանագիրը խոչընդոտող որևէ դրույթ չկա, և սա ոչ միայն քաղաքական, այլև փորձագիտական գնահատական է»,- ասաց Փաշինյանը։
Ավելի վաղ հայտնել էինք, որ Ադրբեջանի նախագահ Իլհամ Ալիևն իր երդմնակալության խոսքում կրկին մեղադրել է Հայաստանին Ադրբեջանի նկատմամբ տարածքային նկրտումների մեջ և պահանջել Երևանից «իր օրենսդրությունը նորմալ վիճակի բերել», այլապես խաղաղության պայմանագիր չի լինի։