ԵՐԵՎԱՆ, 14 փետրվարի – Sputnik. Ռոսպոտրեբնադզորը քաղաքացիներին կոչ է անում գերատեսչության տարածքային մարմիններին տեղեկացնել այն առևտրային կետերի և կայքերի մասին, որտեղ կտեսնեն «Ջերմուկ» ջրի իրացման դեպքեր։ ՌԻԱ Նովոստիի փոխանցմամբ` այդ մասին տեղեկացրել է Ռոսպոտրեբնադզորի մամուլի ծառայությունը:
Նշենք, որ Վլադիկավկազ քաղաքում տղամարդը «Ջերմուկ» հանքային ջրի շշով քացախ է խմել ու կերակրափողի այրվածք ստացել (ավելի ուշ հայտնի դարձավ, որ նա հիվանդանոցում մահացել է)։ Ռոսպոտրեբնադզորը դեպքից հետո հայտարարել էր «Ջերմուկ» ապրանքանիշի հանքային ջրի առանձին խմբաքանակների վաճառքի ժամանակավոր դադարեցման մասին՝ դրանց անվտանգության ստուգման նպատակով։
Ռոսպոտրեբնադզորից հայտնում են, որ խոսքը վերաբերում է «Ջերմուկի»` 28.12.2023 թ. արտադրության ամսաթվով 0,5 լիտր ծավալով ապակե տարաներին:
«Տվյալ արտադրանքը շրջանառության մեջ չի դրվի, քանի դեռ դրա անվտանգության լաբորատոր հաստատումները չեն ստացվել»– նշել են գերատեսչությունից։
Ներկայում կասեցվել է հանքային ջրի առանձին խմբաքանակների` շուրջ 2,5 մլն շշերի իրացումը: Բացի այդ, նշվում է, որ Ռոսպոտրեբնադզորի մասնագետներն ուժեղացրել են հսկողությունը «Ջերմուկ» հանքային ջրի նկատմամբ, ձեռնարկվել են բոլոր միջոցները քաղաքացիների կյանքին և առողջությանը վնաս չպատճառելու համար։
Հիշեցնենք, որ փետրվարի 13–ին «Ջերմուկ» ընկերությունը պարզաբանում էր տարածել, որում բացառել էր շշի մեջ քացախաթթվի առկայությունը։