ԵՐԵՎԱՆ, 13 փետրվարի – Sputnik. Հայաստանի և Ադրբեջանի միջև նոր սահմաններ չպետք է ստեղծվեն, այլ վերահաստատվեն ԽՍՀՄ վերջին շրջանի քարտեզները, որոնք պիտի հիմք հանդիսանան երկու երկրների սահմանի սահմանազատման համար։ Այդ մասին ասել է ՀՀ արտաքին գործերի նախարար Արարատ Միրզոյանը ԵՄ արտաքին դիվանագիտության ղեկավար Ժոզեպ Բորելի հետ համատեղ ասուլիսի ժամանակ։
«Տարածաշրջանի հաղորդակցությունների ապաշրջափակումը պետք է տեղի ունենա երկրների ինքնիշխանության ու օրենսդրության ներքո` փոխադարձության ու հավասարության սկզբունքներով»,– ընդգծեց նա։
Միրզոյանը նշել է, որ Հայաստանն ակնկալում է Ադրբեջանի վերադարձը բանակցությունների սեղան՝ նախկինում համաձայնեցված սկզբունքների հիման վրա։
Նա վերահաստատել է Հայաստանի պատրաստակամությունը 2022 թ. հոկտեմբերին Պրահայում և 2023 թ. աշնանը Գրանադայում քառակողմ հայտարարությունների, ինչպես նաև 2023 թ. մայիսին և հուլիսին Հայաստանի և Ադրբեջանի ղեկավարների հետ եռակողմ հանդիպումների արդյունքներով Եվրոպական խորհրդի նախագահ Շառլ Միշելի հայտարարած որոշումների կատարման հարցում։
Միրզոյանը նաև տեղեկացրել է, որ Բորելի հետ հանդիպմանը քննարկվել են Լեռնային Ղարաբաղից բռնի տեղահանված ավելի քան 100 հազար հայերի իրավունքների և կարիքների հարցերը:
«Երևանը գնահատում է ԵՄ աջակցությունն այդ հարցում»,– վստահեցրեց ՀՀ ԱԳ նախարարը։
Երկկողմ հանդիպմանը քննարկվել են նաև հումանիտար հարցեր, այդ թվում ՝ ձերբակալված հայ անձանց ազատ արձակումն ու հայրենադարձումը, անհետ կորածների ճակատագիրը և Ադրբեջանի վերահսկողության տակ գտնվող տարածքում հայկական մշակութային ժառանգության պահպանումը։
Նա հիշեցրել է, որ որպես վստահության ամրապնդման քայլ` Հայաստանը ականապատ դաշտերի նոր քարտեզներ է տրամադրել Լեռնային Ղարաբաղի նախկին պաշտոնյաների հարցումների հիման վրա և դրանք փոխանցել ադրբեջանական կողմին: Միրզոյանը խնդրել է Եվրամիության ներգրավվածությունը` ստուգելու այդ քարտեզների իսկությունը։