ԵՐԵՎԱՆ, 12 փետրվարի – Sputnik. ՀՀ կրթության, գիտության, մշակույթի և սպորտի նախարարությունն ու պաշտպանական գերատեսչությունը հերքում են լուրերն այն մասին, որ դպրոցներում ու զորամասերում ապամոնտաժվում են Փառքի անկյունները։
Վերջին օրերին լրատվամիջոցներում և սոցիալական ցանցերում տեղեկություն էր տարածվել, որ Փառքի անկյուններն ապամոնտաժվում են, իսկ սխրագործ զինծառայողների լուսանկարները՝ հանվում, և դրանք այլևս չեն զետեղվելու:
«Օգտատերերը խեղաթյուրված, կեղծ տեղեկություններ են տարածում։ Զինված ուժերի գլխավոր շտաբի համապատասխան կառուցվածքային ստորաբաժանումը բոլոր զորամասերի տեղեկատվության և ժամանցի սենյակներում իրականացնում է վերանորոգման աշխատանքներ, այդ թվում` տպագրական նյութերի, քանի որ ժամանակի ընթացքում դրանք մաշվում են»,– Sputnik Արմենիայի հետ զրույցում ասաց ՀՀ պաշտպանության նախարարության մամուլի խոսնակ Արամ Թորոսյանը։
Մեկնաբանության համար դիմեցինք նաև ԿԳՄՍՆ։
«Այդպիսի բան չկա, անհեթեթ սուտ է։ Նման շրջաբերական դպրոցներին չի ուղարկվել»,– Sputnik Արմենիային ասաց ԿԳՄՍՆ–ի տեղեկատվության բաժնի պետ Կարինե Մանուկյանը։
Նա նշեց, որ որևէ լրատվամիջոցում որևէ կոնկրետ դպորցի անուն չի հանդիպել, որտեղ ապամոնտաժվել են այդ անկյունները։