ԵՐԵՎԱՆ, 10 փետրվարի – Sputnik. Ռուսաստանի վարչապետ Միխայիլ Միշուստինը ՌԴ ԱԳՆ աշխատակիցներին և վետերաններին շնորհավորել է մասնագիտական տոնի առթիվ՝ նշելով, որ գերատեսչության համար կարևոր է ապահովել եվրասիական ինտեգրման խորացումը և կյանքի կոչել ՌԴ նախագահ Վլադիմիր Պուտինի՝ եվրասիական մեծ գործընկերություն ձևավորելու նախաձեռնությունը:
Ռուսաստանում Դիվանագիտական աշխատողի օրը նշվում է փետրվարի 10-ին:
Միշուստինն ընդգծել է, որ այժմ երկրում առաջնային է բարեկամ երկրների հետ Ռուսաստանի առևտրատնտեսական համագործակցության ընդլայնումը: Բացի այդ, պահանջված է դիվանագիտական աջակցությունը հեռանկարային նախագծերի իրականացման, արտերկրում ռուսական բիզնեսի շահերի պաշտպանության գործում։
Նրա խոսքով՝ պետք է ձգտել արտերկրում ՌԴ քաղաքացիների և հայրենակիցների իրավունքների ապահովմանը, զարգացնել միջազգային մարդասիրական և գիտական փոխանակումները, ամրապնդել ռուսաց լեզվի և մշակույթի դիրքերն աշխարհում:
ՌԴ վարչապետը նշել է, որ 2024 թվականին ԱՊՀ և ԲՐԻԿՍ մարմիններում Ռուսաստանի նախագահությունը նոր հնարավորություններ է բացում տնտեսական նախաձեռնությունների արդյունավետ առաջխաղացման համար: