ԵՐԵՎԱՆ, 10 փետրվարի – Sputnik․ ԱՄՆ Կոնգրեսի Ներկայացուցիչների պալատ է ներկայացվել «Հայաստանի պաշտպանության ակտ» օրինագիծը, որով առաջարկվում է ապահովել Ազատության Աջակցության ակտի 907–րդ բանաձևի կիրակումը։
Ըստ բանաձևի՝ ԱՄՆ-ն ֆինանսական միջոցներ չի կարող տրամադրել Ադրբեջանի կառավարությանը, մինչև նախագահը չսահմանի և չզեկուցի Կոնգրեսին, որ Ադրբեջանի կառավարությունն ակնհայտ քայլեր է ձեռնարկում՝ դադարեցնելու բոլոր տեսակի շրջափակումները և ուժի այլ հարձակողական գործադրումներն ընդդեմ Հայաստանի և Լեռնային Ղարաբաղի:
«Ալիևը խախտել է միջազգային իրավունքը՝ նախորդ տարի Արցախի վրա մահաբեր հարձակման հրաման տալով։ Նա մինչ օրս որևէ նշանակալի հետևանքների չի բախվել իր ցեղասպան արշավի համար, որի հետևանքով 120 000 հայեր ստիպված են եղել լքել իրենց պատմական հայրենիքը, թեև պարզ էր, որ հարձակումն անխուսափելի է»,- X-ի իր էջում գրել է դեմոկրատ կոնգրեսական Ֆրեն Փալոնը:
Նա շեշտել է, որ վաղուց ժամանակն է՝ ԱՄՆ-ն միջոցներ ձեռնարկի Ալիևին պատասխանատվության ենթարկելու համար։ Ահա թե ինչու է ինքը «Հայաստանի պաշտպանության ակտի» առաջմղման առաջատար դեմոկրատը։
Նախորդ տարվա նոյեմբերին հայտնել էինք, որ ԱՄՆ Սենատը դեմոկրատ Գարի Փիթերսի առաջարկով ընդունել է«Հայաստանի պաշտպանության ակտ 2023» օրինագիծը, որն արգելափակում է Ադրբեջանին տրվող ռազմական օգնությունը։
Որպեսզի օրինագիծն ուժի մեջ մտնի, այն պետք է հաստատվի Ներկայացուցիչների պալատի և ԱՄՆ նախագահի կողմից։