ԵՐԵՎԱՆ, 9 փետրվարի – Sputnik․ Երևանի «Ոսկու աշխարհ»-ում արձանագրված խախտումների մեծ մասը վերացված է, առևտրի կենտրոնը կվերաբացվի։ ՀՀ քաղաքաշինության, տեխնիկական և հրդեհային անվտանգության տեսչական մարմինը հրապարակել է Առաջին ալիքի «Լուրեր»-ի անդրադարձը տեսչական մարմնի անցկացրած ստուգմանը։
Նշենք, որ 2024թ․ հունվարի 23-ին ընկերության գործունեությունը Տեսչական մարմնի որոշմամբ դադարեցվել էր՝ հայտնաբերված և արձանագրված խախտումների հիմքով։ Տեսչական մարմինը լրացուցիչ ստուգում էր, թե գործունեության դադարեցման որոշումից հետո որքանով են կատարվել նախկինում տրված կարգադրագրերի պահանջները։
Ստուգումների արդյունքում պարզվեց, որ նախկինում արձանագրված խախտումների մեծ մասն արդեն վերացված է՝ հակահրդեհային ցանցն աշխատում է, ծխի քարշակների խողովակներ են տեղադրվել, հակահրդեհային ներքին ջրագիծն է վերանորոգվել և այլն։
Տնտեսվարողի դիմումի հիման վրա արված ուսումնասիրություններից հետո ՔՏՀԱ տեսչական մարմնի ղեկավարի կողմից ընկերության գործունեությունը թույլատրելու որոշում է կայացվել: