ԵՐԵՎԱՆ, 9 փետրվարի – Sputnik. Հայաստանի ֆիզիկական կուլտուրային և սպորտի պետական ինստիտուտի նախկին ռեկտոր Դավիթ Խիթարյանը բուհի ռեկտորի ժամանակավոր պաշտոնակատար Տիգրան Սիմոնյանի՝ ասուլիսում նկարագրած իրավիճակը որակում է «կեղծ», «հորինված» և «սուտ»։
«Կառավարման ճգնաժամ եղել է, բայց ոչ իմ պաշտոնավարման ընթացքում, այլ այն պահից սկսած, երբ 2023 թվականի մայիսի 2-ին քննչական կոմիտեն քրեական վարույթ հարուցեց` փաստաթղթեր կեղծելու հիմքով»,- նշում է նախկին ռեկտորը։ Խիթարյանը հաստատում է, որ երկու անգամ հեռացել է բուհից, սակայն պնդում է, որ դրանք եղել են իր դիմումի համաձայն, այլ ոչ թե իրեն հեռացրել են` ինչպես հայտարարել է Տիգրան Ստեփանյանը։
Դավիթ Խիթարյանը հայտնել է նաև, որ դատական կարգով բողոքարկել է իրեն անվստահություն հայտնելու մասին` ինստիտուտի հոգաբարձուների խորհրդի որոշումը և հույս ունի, որ արդարությունը կհաղթի և ինքը կվերականգնվի ռեկտորի պաշտոնում։
Առաջադրված մեղադրանքը` պաշտոնեական փաստաթղթեր կեղծելու վերաբերյալ, նախկին ռեկտորը չի ընդունում` պնդելով, որ ինքը որևէ փաստաթուղթ չի կեղծել։
«Այդ քրեական գործով չկա ոչ մի ցուցմունք, ոչ մի ապացույց, չկա որևէ տուժող կողմ, բայց ես դեռ մնում եմ մեղադրյալի կարգավիճակում։ Արդարացումից հետո օրենքի սահմաններում անելու եմ ամեն ինչ, որ կեղծ ցուցմունք տվողները, գործ կարողները պատժվեն»,-նշում է Խիթարյանը։
Հիշեցնենք` Հայաստանի ֆիզիկական կուլտուրային և սպորտի պետական ինստիտուտի ռեկտորի ժամանակավոր պաշտոնակատար Տիգրան Սիմոնյանը փետրվարի 1-ին Sputnik Արմենիայի մուլիտիմեդիոն մամուլի կենտրոնում հրավիրված ասուլիսում հայտարարել էր, թե բուհի նախկին ռեկտոր Դավիթ Խիթարյանից ծանր ժառանգություն է ստացել, և որ ինստիտուտում կառավարման ճգնաժամ է։
Նրա խոսքով` Խիթարյանի նկատմամբ հարուցված քրեական վարույթից հետո ինստիտուտն ընկել է ցնցումների մեջ։