ԵՐԵՎԱՆ, 7 փետրվարի – Sputnik․ ՀՀ կառավարությունն ու կառավարող քաղաքական ուժը չունեն այնպիսի փաթեթ, որը կարող է այս պահին դնել սեղանին և ասել՝ այսպիսին է լինելու Հայաստանի չորրորդ հանրապետությունը։ Այսօր Ազգային ժողովում կառավարության հետ հարցուպատասխանի ժամանակ այս հայտարարությունն արեց վարչապետ Նիկոլ Փաշինյանը։ Նա նաև մեկնաբանեց, թե ինչ նկատի ունի, երբ ասում է 4-րդ հանրապետություն։
«Ներքին իմաստով նկատի ունեմ ընդունված նոր Սահմանադրություն, այլ ոչ թե փոփոխություն, որն ընդունվել է ժողովրդի կողմից, և բոլորը, նույնիսկ դեմ քվեարկողներն ընդունում են, որ մեծամասնությունը կողմ է քվեարկել»,- ասաց Փաշինյանը։
Նա անդրադարձավ նաև հնչող կասկածներին, թե իշխող ուժը պատրաստվում է նոր Սահմանադրություն ընդունելու համար կեղծել հանրաքվեի արդյունքները։ Փաշինյանն ընդգծեց, որ անգամ եթե իրենց կառավարման օրոք որևէ մեկը ընտրություն կեղծելու խնդիր դնի, վստահ չէ, թե կկարողանա դա անել։
Հիշեցնենք, որ փետրվարի 1–ին Հանրային ռադիոյին տված հարցազրույցի ժամանակ ՀՀ վարչապետը Սահմանադրությունը փոխելու ենթատեքստում Թուրքիան ու Ադրբեջանը համեմատել էր ցլի, իսկ Հայաստանը` կարմիր շորով մարդու հետ։ Նա նշել էր` որքան էլ տատիկի գործած շորը թանկ լինի, Հայաստանը պետք է ընտրի` շարունակում է այդ շորը կրել ու տրորվել ցլի ոտքերի տակ, թե պետք է հանի–շպրտի այն և փրկվի։