ԵՐԵՎԱՆ, 7 փետրվարի – Sputnik․ Այսօր Եվրամիությունը փաստացի մեր տարածաշրջան է հասել, ու սա իրողություն է։ Այսօր Ազգային ժողովում կառավարության հետ հարցուպատասխանի ժամանակ այս հայտարարությունն արեց ՀՀ վարչապետ Նիկոլ Փաշինյանը։
«Եթե նախկինում կարելի էր ասել՝ Եվրամիությունն ո՜ւր, մեր տարածաշրջանն ո՜ւր, հիմա փաստացի Եվրամիությունը մեր տարածաշրջանն է, և մենք այս փաստի հետ պետք է հարաբերվենք»,- ասաց նա։
ՀՀ վարչապետի խոսքով՝ այն հանգամանքը, որ մեր հարևան երկրներից երկուսը` Թուրքիան և Վրաստանն ունեն Եվրամիության անդամության թեկնածուի կարգավիճակ, ազդում է օբյեկտիվ իրականության վրա։
Այս առումով նա կարևորեց Վրաստանի հետ ռազմավարական երկխոսության մեկնարկը։
Անդրադառնալով Վրաստանի հետ ստորագրված «Ռազմավարական գործակցության և երկխոսության մասին» հռչակագրին` Փաշինյանը նշեց, որ դրանում նախատեսված են համագործակցության բոլոր ուղղությունները։
Հիշեցնենք` դեկտեմբերի 14-ին ԵՄ պետությունների ղեկավարները Բրյուսելում կայացած գագաթնաժողովում որոշեցին ԵՄ թեկնածու երկրի կարգավիճակ տրամադրել Վրաստանին: