ԵՐԵՎԱՆ, 5 փետրվարի – Sputnik․ Հունվարի 31-ին Ռադիոտան առջև Արցախի դրոշի բացակայությունը նկատելուն պես դրոշն իր տեղն է վերադարձվել ընկերության դրոշների պահուստից։ Sputnik Արմենիայի հետ զրույցում ասաց Հանրային ռադիոյի տնօրեն Գարեգին Խումարյանը։
Այսօր մամուլում տեղեկություններ տարածվեցին, ըստ որի՝ վարչապետ Նիկոլ Փաշինյանի՝ Հանրային ռադիո հարցազրույցի գալուց առաջ Արցախի դրոշը հեռացվել է։
Խումարյանի խոսքով՝ ժամը 13:00-ի սահմաններում Հանրային ռադիոընկերության աշխատակիցներից մեկը նկատել է, որ ռադիոտան մուտքի դիմաց բարձրացված Արցախի դրոշի փոխարեն ևս Հայաստանի Հանրապետության դրոշն է բարձրացված: Խումարյանը նշում է, որ Ռադիոտան մուտքի դիմաց կա երկու դրոշաձող, որոնցից մեկի վրա ՀՀ պետական դրոշն է, իսկ մյուսի վրա մինչև 2020 թվականը ռադիոընկերության տարբերանշանը պատկերող դրոշն էր: 44-օրյա պատերազմից հետո ընկերության դրոշի փոխարեն բարձրացվեց Արցախի դրոշը:
«Բացառում եմ, որ Հանրային ռադիոընկերության աշխատակիցներից որևէ մեկի առնչությունն այդ միջադեպին: Ունեմ վարկածներ, բայց մինչև հաստատվելը դրանք բարձրաձայնելուց զերծ կմնամ»,- նշեց Խումարյանը։
Նրա հանձնարարությամբ՝ շենքի շահագործման համար պատասխանատու ստորաբաժանումը տեղի ունեցածից հետո բազմապատկել է զգոնությունը։