ԵՐԵՎԱՆ, 1 փետրվարի - Sputnik. Բաքվի և Երևանի միջև խաղաղության հնարավոր կլինի հասնել, եթե Հայաստանը փոփոխություններ կատարի իր Սահմանադրության մեջ։ Այս մասին Ադրբեջանի նախագահ Իլհամ Ալիևը հայտարարել է Միջխորհրդարանական միության գլխավոր քարտուղար Մարտին Չունգոնգի հետ հանդիպման ժամանակ:
Հունվարի 19-ին կառավարության նիստում վարչապետ Նիկոլ Փաշինյանը հայտարարել էր, որ երկրին նոր մայր օրենք է անհրաժեշտ, որը երկիրը «ավելի մրցունակ և կենսունակ կդարձնի աշխարհաքաղաքական և տարածաշրջանային նոր պայմաններում»: Մամուլում, սակայն, տեղեկություններ հայտնվեցին, որ Հայաստանի իշխանությունները որոշել են փոխել Սահմանադրությունը Ադրբեջանի ճնշման տակ։
«Եթե Հայաստանը վերջ դնի Ադրբեջանի նկատմամբ տարածքային նկրտումներին և փոփոխություններ մտցնի Սահմանադրության և այլ նորմատիվ-իրավական փաստաթղթերի մեջ, ապա հնարավոր կլինի հասնել խաղաղության»,-ասել է Ալիևը, հաղորդում են տեղական ԶԼՄ-ները:
Ալիևը հայտարարել է, որ Հայաստանի անկախության հռչակագիրը Ղարաբաղը Հայաստանի հետ միավորելու և Ադրբեջանի տարածքային ամբողջականությունը խախտելու ուղղակի կոչեր է պարունակում, իսկ այդ փաստաթղթի հղումներն արտացոլված են նաև Հայաստանի Սահմանադրության մեջ:
«Բացի այդ, Հայաստանի այլ նորմատիվ իրավական փաստաթղթերում ևս տարածքային պահանջներ կան Ադրբեջանի նկատմամբ, բազմաթիվ կոնվենցիաներում, որոնց միացել է Հայաստանը և այլ փաստաթղթերում կան բազմաթիվ վերապահումներ, որոնք չեն ճանաչում Ադրբեջանի ինքնիշխանությունը Ղարաբաղի նկատմամբ»,-նշել է Ալիևը:
Ադրբեջանի նախագահի խոսքով՝ Երևանի և Բաքվի միջև փաստացի արդեն խաղաղություն է հաստատվել, արդեն մի քանի ամիս է, ինչ սահմանին հանգիստ է:
«Ադրբեջանի և Հայաստանի միջև արդեն գոյություն ունի դե ֆակտո խաղաղություն, մի քանի ամիս է՝ երկու երկրների սահմանին խաղաղ իրավիճակ է տիրում։ Սակայն այդ գործընթացի տրամաբանական ավարտի համար անհրաժեշտ է խաղաղության պայմանագիր կնքել»,-նշել է Ալիևը։
Խոսելով ԵԽԽՎ-ի շուրջ ստեղծված իրավիճակի մասին՝ նա զգուշացրել է, որ եթե ադրբեջանական պատվիրակության իրավունքները չվերականգնվեն, ապա Բաքուն կվերանայի Եվրոպայի խորհրդում և Մարդու իրավունքների եվրոպական դատարանում իր մասնակցության հարցը:
Նշենք, որ ՀՀ վարչապետ Նիկոլ Փաշինյանի՝ նոր Սահմանադրություն մշակելու գաղափարը իշխանությունների հասցեին սուր քննադատության առիթ է դարձել: Ընդդիմախոսները կարծում են, որ դա արվում է Սահմանադրությունից անկախության մասին հռչակագրի հղումը հանելու համար, որում հիշատակվում է Հայկական ԽՍՀ-ի և Լեռնային Ղարաբաղի վերամիավորման մասին որոշումը: