ԵՐԵՎԱՆ, 1 փետրվարի - Sputnik. ԱՄՆ-ն հավանության է արժանացրել Իրաքի և Սիրայի տարածքում Իրանի օբյեկտներին և զինվորականներին հարված հասցնելու ծրագիրն ի պատասխան Մերձավոր Արևելքում ամերիկյան բազաներից մեկի վրա վերջերս իրականացրած աղմկահարրույց հարձակման։ Այս մասին հայտնում է CBS հեռուստաալիքը՝ հղում անելով կառավարական աղբյուրներին։
Աղբյուրի տվյալներով՝ հարվածները նախատեսվում է հասցնել մի քանի օրվա ընթացքում, և դրանց թիրախը լինելու են արաբական երկու երկրների տարածքներում գտնվող Իրանի օբյեկտներն ու զինծառայողները։
Աղբյուրի խոսքով՝ գրոհների իրականացման ժամանակ որոշիչ գործոն են հանդիսանալու եղանակային պայմանները։
Հեռուստաալիքի զրուցակիցները պարզաբանում են, որ ԱՄՆ-ն հնարավորություն ունի հարված հասցնել վատ եղանակին, բայց կգերադասեին անել դա լավ տեսանելիության պայմաններում՝ քաղաքացիական բնակչության շրջանում զոհերից խուսափելու համար։
Հիշեցնենք, որ ԱՄՆ ԶՈւ կենտրոնական հրամանատարության տեղեկություններով՝ հունվարի 28-ին հարձակում էր իրականացվել Հորդանանի հյուսիս-արևելքում գտնվող ամերիկյան բազայի վրա։ Հրամանատարությունը հայտնել էր ԱՄՆ երեք զինվորականների մահվան մասին, իսկ Պենտագոնում նշել են, որ ավելի քան 40 մարդ է տուժել։ Սիրիայի հետ Հորդանանի սահմանին ռազմական օբյեկտի վրա հարձակման պատասխանատվությունը ամերիկացիները դրել են Իրանի հետ առնչություն ունեցող խմբավորումների վրա։ Սպիտակ տանը խոստացել են պատասխանել այդ հարձակմանը։