ԵՐԵՎԱՆ, 31 հունվարի – Sputnik․ ՀՀ քաղաքացիների կյանքն էապես բարելավվել է․ բոլոր մարդիկ սկսել են ավելի լավ ապրել։ Այսօր Ազգային ժողովում ճեպազրույցի ժամանակ այս հայտարարությունն արեց ՀՀ էկոնոմիկայի նախարար Վահան Քերոբյանը։
Ըստ նրա` մի քանի ապացույց կա, որ մարդիկ հիմա ավելի լավ են ապրում։
«Աղքատությունն է կրճատվել, միջին աշխատավարձը 280 հազար դրամ է` մոտ 14 տոկոսով ավելի, քան մեկ տարի առաջ, մեկ տարում մոտ 37 հազար նոր աշխատատեղ է բացվել, մեկ շնչին բաժին ընկնող ՀՆԱ–ն վերջին երեք տարում համարյա կրկնակի աճել է ԱՄՆ դոլարով և, Արժույթի միջազգային հիմնադրամի վերջին կանխատեսումների համաձայն, կկազմի 8 200 ԱՄՆ դոլարից ավելի, որը 2020 թ. 4 267 դոլարի համեմատ մոտավորապես կրկնակի շատ է»,– ասաց նախարարը։
Բացի այդ, նա անդրադարձավ նաև իր եկամուտներին։
«Ես, օրինակ, էապես ավելի վատ եմ ապրում, քան մինչև նախարար դառնալը։ Նախարարի աշխատավարձս էապես ավելի ցածր է, քան մինչ նախարարի պաշտոնը զբաղեցնելը»,– անկեղծացավ Քերոբյանը` վստահեցնելով, որ կողմնակի եկամուտներ չունի։
Նշենք, որ ՀՀ–ում նախարարների աշխատավարձը 793 680 դրամ է, հարկերն ու վճարումները հանած` նրանք 587 760 հազար դրամ են ստանում: Ի դեպ, մինչ նախարար դառնալը Վահան Քերոբյանը ղեկավարում էր իր իսկ հիմնած սննդի առաքման ծառայությունը` Menu.am–ը։