Ազգային անվտանգության ծառայությունն ու քննչական կոմիտեն գործողություններ են իրականացրել Էկոնոմիկայի նախարարությունում ու մի շարք անձանց՝ ընդհանուր առմամբ 15 բնակարաններում՝ երկու տարբեր քրեական վարույթների շրջանակում։
Sputnik Արմենիայի տեղեկություններով՝ ձերբակալվել է վարչապետի հրամանագրով պաշտոնից երեկ ազատված էկոնոմիկայի փոխնախարար Անի Իսպիրյանը և նախարարության պետական ներդրումների քաղաքականության վարչության պետ Լիլյա Սիրականյանը։
Լրագրողները էկոնոմիկայի նախարարին հանդիպել են Ազգային ժողովում, փորձել են պարզել, թե ի՞նչ է կատարվել նախարարությունում։ Նախարար Վահան Քերոբյանը նախ ասել է, որ տեղյակ չէ, որ ԱԱԾ-ն մտել է իր ղեկավարած գերատեսչություն։
«Բնականաբար, պետական կառավարման մարմիններ հիմնականում կարող են մտնել կոռուպցիոն գործերով, և մենք գերկարևորում ենք կոռուպցիայի դեմ պայքարը: Բայց նաև պետք է նշեմ, որ հարգում ենք նաև մարդկանց անմեղության կանխավարկածը: Նաև նշեմ, որ վերջին երեք տարվա մեջ էկոնոմիկայի նախարարության աշխատակիցների հետ կապված նման բաներ չի եղել»,– վստահեցրել է նախարարը:
Դիտարկմանը, որ փոխնախարար Անի Իսպիրյանի ազատումը համընկել է իր նշած այդ գործողությունների հետ՝ Քերոբյանը նշել է, որ դա ընդամենը պատահականություն է։
«Անին 1,5 ամիս առաջ ասել էր, որ ամուսինը Հոլանդիայում աշխատանքի է անցել, պատրաստվում են տեղափոխվել, և տեղափոխվելուց մի քանի օր առաջ դիմում է գրել»,-մանրամասնել է նախարարը։