ԵՐԵՎԱՆ, 30 հունվարի - Sputnik. Վլադիմիր Զելենսկին երկուշաբթի հանդիպում է ունեցել Ուկրաինայի ԶՈւ գլխավոր հրամանատար Վալերի Զալուժնիի հետ և առաջարկել նրան պաշտոնը լքելուց հետո դառնալ Ուկրաինայի իշխանությունների խորհրդականը պաշտպանության գծով։ Այս մասին գրում է Financial Times-ը՝ հղում անելով իրավիճակին ծանող աղբյուրներին։
«Զելենսկին և Զալուժնին հանդիպել են երկուշաբթի երեկոյան՝ քննարկելու գեներալի ապագան։ Նախագահը տեղեկացրել է Զալուժնիին, որ նրան շուտով աշխատանքից կազատեն, և առաջարկել նրան կառավարության խորհրդականի դերը։ Գեներալը հրաժարվել է առաջարկից», - ասվում է պարբերականի հաղորդագրության մեջ։
Թերթը հավելում է, որ Զելենսկու գրասենյակում արդեն իսկ կայացրել են Զալուժնիին պաշտոնանկ անելու որոշումը, մնում է որոշել, երբ է դա տեղի ունենալու, և ով կզբաղեցնի նրա պաշտոնը, ինչպես նաև պարզել՝ արդյոք Զալուժնին կընդունի նոր պաշտոնի առաջարկը։ Նշվում է, որ Զելենսկին մտադիր է փոխարինել ուկրաինական զորքի գլխավոր հրամանատարին, սակայն դա դեռ որոշ ժամանակ կարող է տեղի չունենալ հունվարի 29–ին տարածված հաղորդագրությունների պատճառով։
FInancial Times-ը հավանական թեկնածու է համարում Ուկրաինայի ցամաքային զորքերի հրամանատար, գեներալ-գնդապետ Ալեքսանդր Սիրսկուն և Ուկրաինայի ՊՆ հետախուզության գլխավոր վարչության պետ Կիրիլ Բուդանովին։
Զելենսկու մամուլի քարտուղար Սերգեյ Նիկիֆորովը «Ուկրաինսկայա պրավդա» պարբերականին տված մեկնաբանության մեջ հերքել էր Զալուժնիի հնարավոր պաշտոնանկության մասին լուրերը, նրա խոսքով` նման որոշում հաստատ չի ընդունվել։ Ինքը՝ Զելենսկին, ուկրաինացիներին իր երեկոյան ուղերձում այդ մասին ոչինչ չի հիշատակել։