ԵՐԵՎԱՆ, 30 հունվարի – Sputnik. Հայաստանում Ռուսաստանի դեսպանատունը ցինիկ սադրանք է որակել պաշարված Լենինգրադի երեխաների նվիրված հուշարձանի մոտ դրված ծաղկեպսակների պղծումը։
Ըստ հայտարարության` այդօրինակ գործողությունները դժվար է գնահատել այլ կերպ, քան այդ ողբերգության զոհերի և քաղաքը պաշտպանած հերոսների հիշատակի նկատմամբ բացահայտ անարգանքի արտահայտում:
«Տեսանյութի հեղինակը տրորում էր ոչ թե ֆաշիստական շրջափակումից Լենինգրադի լիակատար ազատագրման 80-ամյակի կապակցությամբ հուշարձանի մոտ դրված ծաղկեպսակները, այլ հայ ժողովրդի լավագույն հատկանիշների հանդեպ հարգանքն ու երախտագիտությունը, որոնք խորհրդանշում էին այդ ծաղկեպսակները»,-ասվում է մեկնաբանության մեջ:
Հայտարարության հեղինակների կարծիքով՝ մարդու գլխում չի տեղավորվում նրանց անբարոյականության աստիճանը, ովքեր հրապարակայնորեն բացահայտ արհամարհանք են հայտնում ոչ միայն այդ ողբերգական իրադարձությունների և դրանց զոհերի, այլև սեփական նախնիների հիշատակի հանդեպ։ Հետազոտողների հաշվարկներով` Լենինգրադի բազմազգ պաշտպանների շարքերում կռվել է ավելի քան 100 հազար հայ, որոնցից 4 հազարը կամավորներ են եղել, նրանցից տասը արժանացել են Խորհրդային Միության հերոսի կոչումների:
«Մենք ուրախ ենք, որ մեր գնահատականի հետ համաձայն է հայ հասարակությունը, ինչի վկայությունն է սոցիալական ցանցերում զանգվածային դժգոհությունը այս այլանդակ արարքի նկատմամբ: Դեսպանությունը հույս է հայտնում, որ այդ գործողությունները համապատասխան իրավական որակում կստանան Հայաստանի իշխանությունների կողմից, իսկ այդ սադրանքի մեջ ներգրավված անձինք կենթարկվեն պատասխանատվության»,- նշել են ռուսական դիվանագիտական ներկայացուցչությունում։
Հիշեցնենք` հունվարի 27-ին քաղաքացի Սամվել Շիրինյանը պաշարված Լենինգրադի երեխաներին նվիրված հուշարձանի մոտ պոկել և տրորել է ՌԴ դրոշը խորհրդանշող ժապավենները, տապալել ծաղկեպսակները և Ռուսաստանի հասցեին վիրավորական մեկնաբանություններով տեսանյութը հրապարակել «Tik Tok» սոցիալական ցանցում։ ՀՀ–ում Ռուսական տան ղեկավարը դեպքի առնչությամբ դիմել է գլխավոր դատախազին։
Նա ընդգծել է, որ Երկրորդ համաշխարհային պատերազմի իրադարձությունների հիման վրա էթնիկ ատելություն հրահրելը և բռնության կոչերն անընդունելի են, և միջադեպի մեղավորները պետք է պատասխանատվության ենթարկվեն։
Այսօր հայտնի դարձավ, որ ՀՀ գլխավոր դատախազությունը ստացել է Ֆեֆիլովի դիմումը, որին ընթացք կտրվի օրենքով սահմանված կարգով: