ԵՐԵՎԱՆ, 30 հունվարի – Sputnik. ՀՀ ազգային ժողովի նախագահ Ալեն Սիմոնյանը հայտարարել է, որ պետական օրհներգը վաղ թե ուշ պետք է փոխվի։ Նա այդ մասին գրել է Telegram-ի իր ալիքում։
«Ինձ համար ակնհայտ է, որ ՀՀ օրհներգը վաղ թե ուշ պետք է փոխվի, այն պետք է լինի հայկական, կապ ունենա մեր պետության ու հայկական երաժշտության հետ և լինի օրհներգի կանոններին համապատասխան: Չեմ պնդում, որ այն պետք է փոխարինել մեծն Արամ Խաչատրյանի երաժշտությամբ, որը, ըստ իս, շքեղ է, անգերազանցելի և մաքսիմալ հայկական, բայց ակնհայտ է, որ առկա օտարածին օրհներգի փոփոխությունն անհրաժեշտություն է»,– գրել է Սիմոնյանը։
Նրա կարծիքով` պետք է նաև զինանշանի փոփոխության հարցը քննարկել։
«Առնվազն չի կարող Հայաստանը լինել ջրի տակ, ինչը պատիժ էր մարդկության համար, չի կարող առյուծը լինել ֆեյսբուքյան սմայլիկի նման, չի կարող Հայաստանը պաշտպանող սուրը լինել շղթայված»,– ընդգծել է ԱԺ նախագահը։
Նշենք, որ գործող իշխանությունը ժամանակ առ ժամանակ բարձրացնում է ՀՀ պետական խորհրդանիշները փոխելու հարցը։ Ավելի վաղ ՀՀ զինանշանը քննադատել էր նաև ՀՀ վարչապետ Նիկոլ Փաշինյանը։