ԵՐԵՎԱՆ, 29 հունվարի – Sputnik. Վրաստանի վարչապետ Իրակլի Ղարիբաշվիլին հրաժարական է տվել։ Այդ մասին նա հայտարարել է ուղիղ եթերում։
Ավելի վաղ հայտնել էինք, որ Իրակլի Ղարիբաշվիլին հրաժարական կտա, նրան այդ պաշտոնում կփոխարինի «Վրացական երազանք - Դեմոկրատական Վրաստան» կուսակցության նախագահ Իրակլի Կոբախիձեն։
«Այսօր ես լքում եմ վարչապետի պաշտոնը»,- ասել է Ղարիբաշվիլին։
Նա հիշեցրել է, որ երկու անգամ եղել է վարչապետ և պաշտոնավարել ընդհանուր առմամբ հինգ տարի։ Ղարիբաշվիլին ընդգծել է, որ քաղաքական թիմի հզորության հիմնական գործոնը ներքին ժողովրդավարությունն է, որի ամենացայտուն դրսևորումը ռոտացիայի սկզբունքն է։
Նա նշել է, որ թիմն ունի բազմաթիվ հաջողակ առաջնորդներ և կարևոր է հնարավորություն տալ մյուսներին։
Ղարիբաշվիլին պարզաբանել է, որ երկիրը կանգնած է նոր մարտահրավերների առաջ, աշնանը տեղի կունենան խորհրդարանական ընտրություններ, և «Վրացական երազանքը» պետք է պատրաստվի ընտրություններում վստահ հաղթանակ տանելուն։
«Ես ընդունել եմ «Վրացական երազանք» կուսակցության նախագահի պաշտոնը ստանձնելու` քաղխորհրդի առաջարկը, որի մասին որոշում կկայացվի փետրվարի 1-ին»,- ասել է նա։
Հիշեցնենք` Իրակլի Ղարիբաշվիլին երկու անգամ է դարձել Վրաստանի վարչապետ։ Նա առաջին անգամ այս պաշտոնը ստանձնել է 2013 թվականի նոյեմբերին` 31 տարեկանում դառնալով Վրաստանի պատմության մեջ ամենաերիտասարդ վարչապետը։ Դրանից հետո նա զբաղեցրել է ներքին գործերի նախարարի և պաշտպանության նախարարի պաշտոնները։
Ղարիբաշվիլին երկրորդ անգամ վարչապետի պաշտոնը ստանձնել է 2021 թվականին։