ԵՐԵՎԱՆ, 29 հունվարի – Sputnik. Ադրբեջանը բնապահպանական պատրվակով կփորձի կանգնեցնել անգամ Երևանում տեղի ունեցող ինչ–որ շինարարություն, քանի որ հասկանում է` Հայաստանի տնտեսական աճն ավելի բարձր է, քան իրենցը։ Այսօր լրագրողների հետ զրույցում այս տեսակետը հայտնեց Հայաստանի հանքագործների և մետալուրգների միության նախագահ, ԶՊՄԿ-ի տնօրենի առաջին տեղակալ Վարդան Ջհանյանը։
«Նրանք թիրախավորում են Հայաստանի խոշոր ձեռնարկությունները, որոնք տնտեսական մեծ ազդեցություն ունեն, օրինակ` ատոմակայանը։ Եթե անգամ Երևանում շինարարություն լինի, ադրբեջանցիները կարող են ասել, որ դա աղտոտում է գետերը, որոնք հոսում են ու Արաքսով հասնում Ադրբեջան։ Նրանք հասկանում են, որ ռազմական առումով էլ ինչ–որ բալանս կարող է ձևավորվել, և նրանք վարում են հիբրիդային պատերազմ Հայաստանի դեմ»,– ասաց նա։
Ջհանյանը հիշեցրեց, որ նման պատերազմ Ադրբեջանը Հայաստանի դեմ չէր վարում մինչև 2021 թվականի վերջը, իսկ հիմա Հայաստանը անգամ մեկ շնչին հասնող ՀՆԱ–ով է գերազանցում Ադրբեջանին։ Սա, ըստ նրա, լուրջ մտավախության առիթ է։
«Նրանք սկսեցին հանքարդյունաբերությունից ոչ միայն Հայաստանում, այլ նաև Արցախում, վառ օրինակ է Կաշենի հանքի հնարովի խնդիրը։ Այդպես նրանք լուծեցին Արցախի հարցը։ Հիմա անցել են Հայաստանում գործող ձեռնարկություններին, և դա առաջին հերթին հանքարդյունաբերող ձեռնարկություններն են»,– հավելեց Ջհանյանը։
Հիշեցնենք` դեռևս հուլիսին ադրբեջանական ԶԼՄ-ները հայտնել էին, որ Բաքուն Երևանից պահանջել է դադարեցնել Ադրբեջանի հետ սահմանին կառուցվող խոշոր մետալուրգիական գործարանի շինարարությունը, քանի որ Երևանը պարտավոր էր Բաքվին տեղեկացնել շրջակա միջավայրի վրա նշված գործունեության ազդեցության մասին: