ԵՐԵՎԱՆ, 29 հունվարի – Sputnik. 2024 թվականին Եվրասիական տնտեսական միությունում ՀՆԱ-ի ավելի քան 2,5 տոկոս աճ է կանխատեսվում: Տեղեկությունը հայտնել է ՌԴ փոխվարչապետ Ալեքսեյ Օվերչուկը «Էքսպերտ» ամսագրին տված հարցազրույցում։
«2022 թվականին Հայաստանի ՀՆԱ-ն աճել է 12,6%-ով, Ղրղզներինը՝ 6,3%-ով։ 2023 թվականին բոլոր հինգ երկրներում ՀՆԱ-ի լավ դինամիկա է եղել։ 2024 թվականի կանխատեսումը նույնպես լավատեսական է՝ ավելի քան 2,5 տոկոս ամբողջ իության համար», - ասել է նա։
Բացատրելով նման արդյունքը՝ Օվերչուկը նշել է, որ «միաժամանակ համընկել են բազմաթիվ գործոններ, աշխատել է նաև այն միջոցների և որոշումների կուտակված ազդեցությունը, որոնք ընդունվել են ԵԱՏՄ-ում դրա գոյության բոլոր տարիների ընթացքում», ուստի «ճիշտ չէ խոսել միայն ռելոկացիայի և զուգահեռ ներմուծման ազդեցության մասին»:
«Մաքսային և այլ խոչընդոտների բացակայությունը, աշխատանքի ընդհանուր շուկան նպաստում են Հայաստանի, Ղազախստանի ու Ղրղզստանի ներդրումային ներուժի բացահայտմանը», - նշել է նա:
Խոսելով հեռացածների մասին՝ Օվերչուկը նշել է, որ «շատերն արդեն վերադարձել են տուն, և այդ երկրների տնտեսությունների վրա նրանց ազդեցությունը գնահատելը բավական դժվար է»:
«Օրինակ՝ 2021-2022 թվականներին Ռուսաստանից Հայաստան փոխանցումների հնգակի աճ է գրանցվել՝ 867 մլն դոլարից մինչև 4385 մլն դոլար, սակայն այնտեղ հաշիվներ բացելու պատճառներից մեկը եղել է նաև միջազգային վճարային համակարգերին հասանելիություն ստանալը», - փաստել է նա։
Օվերչուկն ասել է, որ ԵԱՏՄ անդամ երկրները հասկանում են՝ Արևմուտքը չի կարող որպես առևտրային գործընկեր և ներդրող փոխարինել Ռուսաստանին:
«ԵԱՏՄ գործընկերները գիտեն, թե որքան սերտորեն են կապված մեր տնտեսությունները, ուստի հասկանում են, որ Ռուսաստանին և Բելառուսին հասցված վնասը կանդրադառնա նաև իրենց վրա», - նշել է նա։
Նրա խոսքով՝ ԵԱՏՄ գործընկերների ապրանքաշրջանառության մեջ Ռուսաստանն առաջատար դիրքեր է զբաղեցնում։
«2023 թվականի 11 ամիսների արդյունքներով Ռուսաստանը Հայաստանի ապրանքաշրջանառության մեջ առաջին տեղն է զբաղեցնում, Ղազախստանի և Ղրղզստանի հետ առևտրում մշտապես մրցում է Չինաստանի հետ առաջին տեղի համար։ Դիտարկելով կլիմայական փոփոխությունները՝ նրանք նաև գիտակցում են, որ տարածաշրջանում ամենամոտ երկիրը, որն ապահովված է ջրով, Ռուսաստանն է», - պարզաբանել է նա։
Ռուսաստանի փոխվարչապետն ուշադրություն է հրավիրել նաև այն փաստի վրա, որ ավանդական պահուստային արժույթների օգտագործման արգելքը խթանել է միության երկրների տնտեսություններին անցնել ազգային արժույթներով հաշվարկների․ դրանց մասնաբաժինը 2023 թվականին հասել է 90 տոկոսի։