ԵՐԵՎԱՆ, 25 հունվարի - Sputnik. «Եռաբլուրի գործով» ոստիկանների նկատմամբ հանրային քրեական հետապնդում կհարուցվի։ Այս մասին իր ֆեյսբուքյան էջում գրել է ծնողների փաստաբան Վահե Հովհանիսյանը։
ՀՀ հակակոռուպցիոն դատարանը բավարարել է փաստաբան Վահե Հովհանիսյանի ներկայացրած բողոքը ոստիկանների նկատմամբ հանրային քրեական հետապնդում չհարուցելու դեմ։
Պաշտպանը նշել է, որ ՀՀ հակակոռուպցիոն դատարանը՝ նախագահությամբ դատավոր Մերի Մոսինյանի, վերացրել է նաև ՀՀ գլխավոր դատախազության հիշյալ որոշումը։
Հիշեցնենք՝ 2022 թվականի սեպտեմբերի 21-ին` ՀՀ Անկախության օրը, երբ զոհվածների ծնողները Եռաբլուր էին գնացել, որ արգելեն վարչապետ Նիկոլ Փաշինյանին մոտենալ իրենց որդիների շիրիմներին, բախումներ տեղի ունեցան ոստիկանների հետ։
Ոստիկանության ծառայողները բիրտ ուժ կիրառեցին ծնողների նկատմամբ։ Նույն օրը ոստիկանության աշխատակիցները ծնողների մի մասին բերման էին ենթարկել, դեպքի առնչությամբ քրեական վարույթ էր հարուցվել. մինչ օրս որևէ ոստիկան պատասխանատվության չի ենթարկվել։