ԵՐԵՎԱՆ, 24 հունվարի – Sputnik. Դաժանությունների և բռնաճնշումների մակարդակով ԵԽ մի շարք երկրներ նահանջել են միջնադար։ Այս մասին հայտարարել է ԵԽԽՎ–ում Հայաստանի ներկայացուցիչ Վլադիմիր Վարդանյանը ՝ Եվրոպայի խորհրդի անդամ երկրների կալանավայրերում դաժան և անմարդկային վերաբերմունքի մասին զեկույցի շրջանակներում տեղի ունեցած քննարկման ժամանակ։
Նա հիշեցրել է, որ անկախ ամեն ինչից միջազգային իրավունքի համաձայն՝ խոշտանգումները բացարձակապես արգելված են։
«Երբ ես առաջին անգամ կարդացի զեկույցը, ինձ թվաց, որ սխալվել եմ և կարդում եմ ոչ թե ժամանակակից փաստաթուղթ, այլ միջնադարից եկած: Հնարավոր չէ, որ դա ընդունելի լինի թվային դարաշրջանում որևէ երկրում»,- ասել է Վարդանյանը։
Նրա խոսքով` որոշ երկրներում խոշտանգումները սկսել են սիստեմատիկորեն կիրառվել մարդկանց տարբեր խմբերի հետապնդման համար, ինչը համեմատելի է մարդկության դեմ հանցագործությունների հետ։
Նշենք, որ, ինչպես ավելի վաղ նշել էր ԵԽԽՎ–ում Դանիայից պատգամավոր Մոգենս Յենսենը, զեկույցում կան նաև Ադրբեջանի իրավապահ մարմինների վայրագությունների դեպքերը։