ԵՐԵՎԱՆ, 23 հունվարի – Sputnik. Ինտերնետի միջազգային կապուղիներում խնդիրներ կան, ինչի հետևանքով վերջին ժամերին Հայաստանի բաժանորդներն ինտերնետից օգտվում են խափանումներով։ Օպերատորները պաշտոնական հաղորդագրություններ են տարածել՝ ներկայացնելով ստեղծված իրավիճակը։
«Յուքոմ» ընկերությունից տեղեկացնում են, որ միջազգային կապուղիներում առկա տեխնիկական խնդիրների պատճառով ցանցի որոշ հատվածներում նկատվել են խափանումներ, որոնք այժմ կարգավորված են:
«Կարգավորումները որոշ ժամանակ անց ամբողջապես զգալի կլինեն բոլոր բաժանորդների համար»,- նշում են ընկերությունից։
«Վիվասել ՄՏՍ Արմենիա» ընկերությունից էլ հայտնում են, որ մատակարար ընկերության կապուղու վթարի պատճառով առկա է տվյալների փոխանցման ծառայությունների անկայունություն։
«Գործի է դրվել ռեզերվային համակարգը։ Մատակարարի կողմից կատարվում են անհրաժեշտ աշխատանքներ՝ վթարը շուտափույթ վերացնելու ուղղությամբ»,- նշված է հաղորդագրության մեջ։
Նշենք, որ Հայաստան մտնող մալուխի վնասման հետևանքով հունվարի 21-ին ևս ինտերնետի խափանումներ էին արձանագրվել։
Հավելենք, որ Հայաստանում ժամանակ առ ժամանակ ինտերնետային կապի ընդհանուր խափանումներ են դիտվում։ Նախորդ տարվա հունվարին Հայաստանում գրանցվեց ինտերնետ կապի հերթական լուրջ խափանումը, երբ նույնիսկ բանկային քարտով վճարում հնարավոր չէր իրականացնել։