Առնո Բաբաջանյանի 103-ամյակն է. կոմպոզիտորի արձանի մոտ ծաղիկներ են խոնարհել

ԵՐԵՎԱՆ, 21 հունվարի – Sputnik. Այսօր ԽՍՀՄ ժողովրդական արտիստ, հայտնի կոմպոզիտոր Առնո Բաբաջանյանի ծննդյան 103-ամյակն է։

Երևանի «Русский дом»-ի աշխատակիցները և Առնո Բաբաջանյան հիմնադրամի ներկայացուցիչները, տնօրենն այսօր ծաղիկներ են խոնարհել մայրաքաղաքի կենտրոնում գտնվող կոմպոզիտորի արձանի մոտ:

«Երբ բառերը չեն բավականացնում, օգնության է հասնում Բաբաջանյանի երաժշտությունը»,- ասել է «Русский дом»-ի մշակութային և պատմամշակութային ծրագրերի բաժնի մեր աշխատակից Արամ Գյուրջյանը:

Նշենք, «Ռոսսոտրուդնիչեստվո»-ն Առնո Բաբաջանյան հիմնադրամի հետ համատեղ համերգային ծրագիր կանցկացնի հունվարի 22-ին՝ ժամը 16:00-ին, Բաղրամյան 34 հասցեում:

Նշենք, որ Առնո Բաբաջանյանի ծննդյան օրը համարվում է հունվարի 22-ը: Իսկ ինչո՞ւ է «համարվում»։ Իրականում մաեստրոն ծնվել է մեկ օր առաջ՝ 21-ին։ Բայց երեք տարի անց այդ օրը մահացել է Լենինը։ Այդ կապակցությամբ 15 հանրապետություններում ամենամյա սուգ է հայտարարվել։ Համընդհանուր սգի ժամանակ տոնակատարություն չկազմակերպելու համար հեռատես հայրը փոխել է որդու ծննդյան օրը:

Առնո Բաբաջանյանը մահացել է 1983 թվական նոյեմբերի 11-ին լեյկեմիայի հետևանքով առաջացած բարդություններից։