ԵՐԵՎԱՆ, 19 հունվարի – Sputnik. Ռուսական կապիտալով ընկերությունները բարձր սոցիալական պատասխանատվություն և մարդկային համերաշխություն են ցուցաբերել Լեռնային Ղարաբաղից տեղահանվածներին օգնություն ցուցաբերելու գործում: ՌԻԱ Նովոստիին այս մասին ասել է Հայաստանում Ռուսաստանի դեսպան Սերգեյ Կոպիրկինը։
««Գազպրոմը», ՀԿԵ-ն, «Արմենալը», Զանգեզուրի պղնձամոլիբդենային կոմբինատը. նրանք, իրոք, շատ բան են արել տեղահանվածներին օգնելու համար։ Դա նաև բնակարանի տրամադրման, ֆինանսական օգնության, աշխատանքի տեղավորման օժանդակությունն է։ Այսինքն, իսկապես, գործնականում դրսևորվել է այն ընդհանրությունը, այն համերաշխությունը, որ գոյություն ունի մեր երկրների և ժողովուրդների միջև, և դա շատ կարևոր է», - ասել է դեսպանը։
Նա նշել է, որ առաջին օրերից շատ մեծ ջանքեր են գործադրվել Լեռնային Ղարաբաղի բնակիչներին օգնություն ցուցաբերելու գործում իրենց ներդրումն ունենալու համար:
Դեսպանն ավելացրել է, որ պետական մարմինների աջակցությամբ ընդհանուր առմամբ 40 տոննա մարդասիրական օգնություն է տրամադրվել, որն իր մեջ ներառում է անհրաժեշտ նյութեր, օբյեկտներ, այդ թվում՝ շարժական էլեկտրակայան` վերաբնակիչների կարիքների բավարարման հարցում անմիջական աջակցություն ցուցաբերելու համար:
Զգալի օգնություն է ցուցաբերվել նաև «Դոկտոր Լիզա» մարդասիրական հիմնադրամի, ռուսական մարդասիրական նախաձեռնության, ՌԴ մարդու իրավունքների հանձնակատարի աշխատակազմի գծով:
«Ռուսական արտասահմանյան հաստատությունները նախաձեռնել են տաք հագուստի, հիգիենայի պարագաների հավաքագրում Լեռնային Ղարաբաղից տեղահանվածների, այդ թվում՝ Լեռնային Ղարաբաղի ռուսական համայնքի համար։ Ընդ որում, դա վերևից եկած ինչ-որ բան չէր, դա հենց մարդկանց, հենց աշխատակիցների նախաձեռնությունն էր», - ասել է Կոպիրկինը։
Դեսպանն անդրադարձել է նաև սեպտեմբերյան ողբերգական իրադարձությունների ժամանակ ռուս խաղաղապահների գործողություններին:
«Ռուս խաղաղապահները (չնայած նրանց այստեղ շատ պահանջներ են ներկայացնում, մենք դա գիտենք), իհարկե, շատ բան են արել, որ էսկալացիա թույլ չտան, խաղաղ բնակչության շրջանում զոհեր թույլ չտան», - ավելացրել է նա:
Մասնավորապես, համապատասխան հենակետերում, դիրքերում ապաստան էին տալիս խաղաղ բնակչությանը, օգնում էին տարհանել նրանց, ովքեր տուժել էին Ստեփանակերտի մոտ վառելիքի պահեստի սարսափելի պայթյունից։
Հիշեցնենք, որ ադրբեջանական ագրեսիայի և դրան հաջորդած բռնի տեղահանման հետևանքով Լեռնային Ղարաբաղից Հայաստանի Հանրապետություն է տեղափոխվել ավելի քան 100 հազար մարդ: