ԵՐԵՎԱՆ, 18 հունվարի – Sputnik. Սյունիքի մարզի Ճակատեն բնակավայրի ոստիկանական հենակետի մոտ ավտոմեքենայում 12 կգ թմրանյութ հայտնաբերելուց հետո ձերբակալված վարորդը և ուղևորը կալանավորվել են։ Տեղեկությունը հայտնում է ՀՀ քննչական կոմիտեն։
Նշվում է, որ հունվարի 11-ին ոստիկանները առանձնապես խոշոր չափերով թմրանյութ իրացնելու կասկածանքով կանգնեցրել են «Կրայսլեր» մակնիշի ավտոմեքենա, որի խուզարկությամբ հայտնաբերվել են 12 կգ քաշով տարբեր տեսակի թմրամիջոցների նմանվող զանգվածներ։
Նշանակված փորձաքննության եզրակացությամբ շուրջ 4,6 կիլոգրամը հանդիսացել է «Մեթամֆետամին», 200 գրամը՝ «Հերոին» տեսակի թմրամիջոց։ Փորձաքննություն է նշանակված նաև հայտնաբերվածից շուրջ 6,2կգ «Մարիխուանա» տեսակի, ինչպես նաև՝ «Ափիոն» և «Էքստազի» տեսակի թմրամիջոցների նմանվող զանգվածների բաղադրությունը պարզելու նպատակով։
Պարզվել է նաև, որ ավտոմեքենայի վարորդը և ուղևորը, նախնական պայմանավորվածություն ունենալով ԻԻՀ՝ քննությամբ դեռևս ինքնությունը չպարզված անձի կամ անձանց հետ, հունվարի 11-ին մեկնել են հայ-իրանական սահմանի համապատասխան տեղանք, որտեղից վերցրել են պոլիէթիլենային երեք խոշոր փաթեթներով ԻԻՀ-ի տարածքից մաքսանենգ ճանապարհով փոխանցված թմրանյութերը։
Երկու անձանց մեղադրանք է ներկայացվել՝ ՀՀ քրեական օրենսգրքի 393-րդ հոդվածի 3-րդ մասի 2-րդ կետով (իրացման նպատակով առանձնապես խոշոր չափերով թմրամիջոցների շրջանառությունը) և 46-399-րդ հոդվածի 3-րդ մասի 2-րդ կետով (առանձնապես խոշոր չափերով թմրամիջոցների մաքսանենգությունը)։ Որպես խափանման միջոց՝ վերջիններիս նկատմամբ ընտրվել է կալանավորումը։
Նախաքննությունը շարունակվում է: Ձեռնարկվում են անհրաժեշտ միջոցառումներ՝ թմրամիջոցների ձեռք բերման աղբյուրը, ինչպես նաև ապօրինի շրջանառության ողջ շղթան պարզելու ուղղությամբ: