ԵՐԵՎԱՆ, 17 հունվարի – Sputnik. Երևանի քաղաքապետարանն իր պատճառներն ունի, թե ինչու մինչ այս պահը Օղակաձև այգու 4-րդ հատվածում գտնվող տնտեսվարողների հետ չի խոսել այնտեղի թենիսի կորտերի և սրճարանների քանդման մասին։
Ավելի վաղ Երևանի քաղաքապետարանից հայտնել էին, թե թենիսի կորտերը Օղակաձև այգու տրամաբանության մեջ չեն տեղավորվում. հատկանշական է` կորտերը կառուցվել են 1950-ականներին, իսկ այդ ժամանակ և դրանից երկար տարիներ հետո էլ այգին չի եղել։ Քաղաքային իշխանություններն իրենց դիրքորոշման մեջ հաստատակամ են` բոլոր սրճարանները և տարաբնույթ այլ շինությունները պետք է քանդվեն, որպեսզի զբոսայգին վերադարձվի երևանցուն։
Նշենք նաև, որ Օղակաձև այգու 4-րդ հատվածում գտնվող «Արարատ» թենիսի ակումբի տնօրինությունը տարակուսած է, որ քննարկումներ արդեն կան, բայց իրենց հետո որևէ մեկը չի հանդիպել ու իրենց կարծիքն էլ որևէ մեկը չի հարցրել։
Ճեպազրույցի ժամանակ Երևանի քաղաքապետի մամուլի խոսնակ Հայկ Կոստանյանը շեշտեց` տնտեսվարողների հետ դեռևս չհանդիպելու և չզրուցելու պատճառն այն է, որ դեռ վերջնական լուծում չկա։
«Երկրորդն էլ` Օղակաձև այգու 4-րդ հատվածը դեռ պետք է հանրային գերակա շահ ճանաչվի։ Այս պահին ծրագրի հետ կապված քննարկումներ է իրականացնում ընկերությունը (GreenRock- խմբ.), որից հետո կներկայացնի քաղաքապետարան»,– ասաց Հայկ Կոստանյանը։
Նա ընդգծեց` անկախ նրանից, թե ինչ ծրագիր կհայտնվի քաղաքապետարանի սեղանին, վերջնարդյունքում հենց իրենք են հավանություն տալու դրան։ Կոստանյանը նշեց, որ հավանություն ստանալուց հետո միայն հանրային լսումներ կարվեն, իսկ քաղաքապետարանն էլ ընդհանուր կներկայացնի, թե ինչի մասին է լինելու այդ ծրագիրը։