ԵՐԵՎԱՆ, 16 հունվարի – Sputnik. Հայաստանի խորհրդարանն այսօր ընդունեց գիտական աստիճանների փոխադարձ ճանաչման մասին Եվրասիական տնտեսական միության համաձայնագիրը: Համաձայնագիրը վավերացվել է միաձայն՝ 95 կողմ ձայնով:
Օրինակ` եթե գիտությունների թեկնածուն կամ դոկտորը Հայաստանից եկել է Ռուսաստան (կամ հակառակը՝ Ռուսաստանից Հայաստան), ապա աշխատանքի տեղավորվելու դեպքում նրա գիտական աստիճանը ավտոմատ կճանաչվի՝ առանց լրացուցիչ պահանջների։
Նախկինում դրա համար անհրաժեշտ էր անցնել մի շարք բյուրոկրատական ընթացակարգեր, որոնք շատ տարբեր էին՝ կախված երկրից և գիտական հաստատությունից: Հիմա այդ ձևականությունները կվերացվեն։
Եվրասիական տնտեսական միությունը միջազգային ինտեգրացիոն տնտեսական միավորում է, որը գործում է 2015 թվականի հունվարի 1-ից: Միության անդամներն են Ռուսաստանը, Հայաստանը, Բելառուսը, Ղազախստանը և Ղրղզստանը: