ԵՐԵՎԱՆ, 15 հունվարի - Sputnik. Հարգանքն ու ժողովրդականությունը կոչումներով չենորոշվում։ ՀՀ Ազգային ժողովում այս մասին հայտարարեց ՀՀ ԱԺ նախագահ Ալեն Սիմոնյանը` անդրադառնալով «ՀՀ պետական պարգևների և պատվավոր կոչումների մասին» օրենքում փոփոխություններ կատարելու մասին նախագծին։
Ըստ նրա` Լուչիանո Պավարոտին ու Մայքլ Ջեքսոնը որևէ երկրի վաստակավոր արտիստ չեն, իրենք կան ու եղել են մարդկության համար արժեք։
«ՀՀ–ում ինչ են արել. ծառայություն են մատուցել` գնացել, ինչ–որ մեկի երեխայի հարսանիքին լավ երգել են, նստած շեֆն ասել է, որ սրան կազմակերպեք, մի հատ ժողովրդական կամ վաստակավորի կոչում տվեք։ Մականանունավոր մարդիկ կան, ես այդ ցանկը գիտեմ, որոնք երաժշտության ոլորտում կոչում են ստացել։ Հիմա էստեղ (Ազգային ժողովում,–խմբ.) էլ կա, չեմ ուզում անունը տալ, իր անուն–ազգանունը գրել չգիտի, էստեղ ելույթ ունենալ չի կարողանում, գիտությունների թեկնածու է ստացել։ Հիմա ենք ուղղում այդ սխալները»,– հայտարարեց Սիմոնյանը։
Նա նաև նշեց, որ այսօր այլևս էլիտաներ չկան, կա մի էլիտա, դա ժողովուրդն է։
Հիշեցնենք, որ ՀՀ կառավարությունն Ազգային ժողովին առաջարկում է չեղարկել պատվավոր կոչումների համակարգը։ Դրանով առաջարկվում է չեղարկել «ժողովրդական» և «վաստակավոր» 17 պատվավոր կոչումները և ներդնել խրախուսման այլ՝ առավել ժամանակակից ինստիտուտ։ Ըստ կառավարության` կոչումների համակարգը ներմուծվել է խորհրդային ժամանակներում՝ տարբեր անհատների արժանի կամ արժանի տիտղոսավորելու համար, սակայն նաև բազմաթիվ դեպքեր են եղել, երբ անհատը կոչումը ստանալուց հետո դադարել է որևէ կերպ առաջընթաց գրանցել իր մասնագիտական ոլորտում։