ԵՐԵՎԱՆ, 13 հունվարի – Sputnik. Սպիտակ տունը մի շարք գերատեսչությունների տեղեկացրել է հնարավոր «շաթդաունի» մասին։ Տեղեկությունը հայտնում է ՌԻԱ Նովոստին՝ հղում անելով արևմտյան ԶԼՄ-ներին:
«Սպիտակ տունը երեկ օրը մի շարք գերատեսչությունների տեղեկացրել է հնարավոր կառավարական «շաթդաունի» նախապատրաստվելու անհրաժեշտության մասին»,-ասված է հաղորդագրության մեջ:
Նշվում է, որ Սպիտակ տան վարչական-բյուջետային վարչությունը գերատեսչություններին հանձնարարել է գործողությունների ծրագրեր նախապատրաստել` հաշվի առնելով պետական ֆինանսավորման հնարավոր դադարեցման հանգամանքը։
ԶԼՄ-ներն ավելի վաղ գրել էին, որ հունվարի 20-ից հետո ամերիկյան կառավարության աշխատանքը դադարեցնելու շանսերը բավական մեծ են, քանի որ Ներկայացուցիչների պալատի խոսնակ Մայք Ջոնսոնը խոստացել է այլևս ընթացք չտալ ժամանակավոր ֆինանսավորման մասին օրինագծերին: «Շաթդաունի» դեպքում առաջինը կդադարեցվի գյուղատնտեսության, էներգետիկայի, տրանսպորտի և վետերանների գործերի նախարարությունների աշխատանքը: ԱՄՆ կառավարության մնացած մասը մշտական բյուջեի բացակայության պայմաններում կդադարի գործել փետրվարի 3-ից:
ԱՄՆ-ում «shutdown» են անվանում պետական հաստատությունների աշխատանքի դադարեցումը ֆինանսավորման բացակայության պատճառով։ Նման սցենարի դեպքում այն պետծառայողները, որոնք ներգրավված են ծայրահեղ կարևոր աշխատանքում, ստիպված կլինեն իրենց պարտականությունները կատարել առանց վարձատրության, իսկ մյուսներին կուղարկեն հարկադիր արձակուրդի։