ԵՐԵՎԱՆ, 12 հունվարի – Sputnik. ՀՀ ԶՈւ գլխավոր շտաբի պետի նախկին տեղակալ Տիրան Խաչատրյանը ձերբակալվել է այն պահին, երբ պատրաստվում էր ներկայանալ ոստիկանական բաժին։ Տեղեկությունը հայտնում է փաստաբան Վարազդատ Հարությունյանը, որը Վաչե Սիմոնյանի հետ ստանձնել է գեներալ-լեյտենանտի շահերի պաշտպանությունը։
«Այս փուլում հարկ եմ համարում շեշտել, որ մամուլում տարածվող տեղեկատվություններն այն մասին, թե իբր գեներալ Խաչատրյանը փախել կամ թաքնվել է քննությունից, չի համապատասխանում իրականությանը, հերյուրանք է և նպատակ ունի բացասաբար ազդելու գեներալ Խաչատրյանի հեղինակության վրա։ Ձերբակալման պահին գեներալ Խաչատրյանը գտնվել է ինձ հետ․ մենք միասին պատրաստվում էինք դուրս գալ և ներկայանալ ոստիկանության բաժին։ Տեղեկությունը, ըստ որի, Տիրան Խաչատրյանը հարբած վիճակում իրականացրել է խուլիգանություն, նույնպես հերյուրանք է»,– գրել է փաստաբանը ֆեյսբուքյան էջում։
Հարությունյանը նշել է, որ նախաքննությանը չվնասելու նպատակով այս փուլում զերծ կմնան գործի մանրամասների վերաբերյալ հրապարակային հայտարարություններից, սակայն վստահեցնում է, որ գործի քննությունը ցույց կտա, որ Տիրան Խաչատրյանը որևէ խուլիգանական արարք թույլ չի տվել։
Հիշեցնենք` ըստ ԶԼՄ–ների` հունվարի 11-ին Կոտայքի մարզում` «Էրիկի մոտ» հացատանը, խնջույքի ժամանակ մոտ 10 անձի միջև վիճաբանություն է եղել, որի ժամանակ ՀՀ ԶՈւ գլխավոր շտաբի պետի նախկին տեղակալ Տիրան Խաչատրյանն իրեն պարգևատրված զենքով կրակոցներ է արձակել, միջադեպի ժամանակ Արցախի բնակիչ Հրայր Մնացականյանը մարմնական վնասվածքներ է ստացել և տեղափոխվել հիվանդանոց։
ՆԳՆ–ի տարածած հաղորդագրության համաձայն` հրազենային վնասվածք է ստացել 47–ամյա մի տղամարդ։ Վնասվածք պատճառողը ձերբակալվել է Ջրվեժ թաղամասի հյուրանոցներից մեկում։