ԵՐԵՎԱՆ, 11 հունվարի – Sputnik. ՀՀ վարչապետ Նիկոլ Փաշինյանը մտադիր է իր սանիկին նշանակել Արմավիրի մարզպետ, գրում է «Հրապարակ» օրաթերթը։
«Նիկոլ Փաշինյանը, ըստ ամենայնի, կողմնորոշվել է Արմավիրի նոր մարզպետի հարցում և այդ պաշտոնում կնշանակի իր սանիկ Դավիթ Խուդաթյանին, որը Արմավիր խոշորացված համայնքի ղեկավարն է»,–գրում է թերթը։
Նշվում է, որ Արմավիր խոշորացված համայնքում` Խուդաթյանի աշխատակազմում արդեն վերջինիս փոխարինողի հարցն է քննարկվել։
«Ըստ որոշ տեղեկությունների՝ համայնքի ավագանին Խուդաթյանի փոխարեն ղեկավար կընտրի նրա առաջին տեղակալ Վարշամ Սարգսյանին»,–գրում է լրատվամիջոցը։
Հիշեցնենք՝ հունվարի 5–ին Արմավիրի մարզպետ Էդվարդ Հովհաննիսյանը կառավարության որոշմամբ ազատվեց պաշտոնից։ Նույն օրն ավելի վաղ ՀՀ վարչապետ Նիկոլ Փաշինյանն այցելել էր Արմավիրի մարզ, կանգ առել Արագած բնակավայրում, շրջել Մ. Մեխակյանի անվան միջնակարգ դպրոցում և մի շարք թերություններ ու խնդիրներ արձանագրել։
Փաշինյանը հունվարի 3-ին այցելել էր նաև Լոռու մարզի դպրոցներ և մի շարք խախտումներ արձանագրել։ Հաջորդ օրը պաշտոններից ազատվեցին Լոռու մարզպետ Արամ Խաչատրյանը և Քաղաքաշինության կոմիտեի նախագահ Արմեն Ղուլարյանը։